Хоразм вилоят прокуратураси томонидан тегишли мутахассислар иштирокида текшириш ўтказилганда Урганч тумани ҳокимлиги Архитектура ва ер ресурслари бўлими мансабдор шахслари ўз мансаб ваколатларини суиистеъмол қилгани, ҳамда ўз вазифаларига лоқайд муносабатда бўлгани оқибатида давлат ва жамият манфаатларига жуда кўп миқдорда зарар етказилганлиги аниқланган.
Аниқланишича, Ўзбекистон Президентининг «Қишлоқ хўжалигида ер ва сув ресурсларидан самарали фойдаланиш чора-тадбирлари тўғрисида»ги фармони, Ер кодексининг 3, 8 ва 34-моддалари талабларига зид равишда, ўзбошимчалик билан, ноқонуний равишда, бош режа лойиҳаси ва тегишли ташкилотларнинг рухсатисиз Урганч тумани ҳокимининг қарорларига кўра, Ш.Давлетовга Чаккашоликор қишлоғи ҳудудида «Енгил типдаги иссиқхона» қуриш учун 1 гектар, шунингдек, Д.Искандаровга «Енгил типдаги иссиқхона» қуриш учун 0,6 гектар, Х.Худайбергановга туман ҳокимининг «Паррандачилик ва чорвачиликка ихтисослашган фермахона қуриш учун ер майдони ажратиш ҳақида»ги қарорига ўзгартириш киритилиб, Чаккашоликор қишлоғида «Савдо ва маиший хизмат шохобчаси» қуриш учун 0,5 гектар, М.Султоновага туман ҳокимининг Ғойбу қишлоғи ҳудудидан «Чойхона, офис ва автомобилларга техник хизмат кўрсатиш шохобчаси» қуриш учун ер майдони ажратиш ҳақидаги қарорига ўзгартириш киритилиб, Чаккашоликор қишлоғи ҳудудидан «Чойхона, офис, автомобилларга техник хизмат кўрсатиш шохобчаси» қуриш учун 0,39 гектар, Б.Давлетовга Чаккашоликор қишлоғи ҳудудида «Савдо ва маиший хизмат кўрсатиш шохобчаси» биноси қуриш учун 0,35 гектар ер майдони ажратиб берилган.
Умумий ҳисобда 5 та ҳолатда ер ажратишда амалдаги тартибни четлаб ўтган ҳолда 2,8 гектар сувли, экин ерлари нотурар ва турар жой қурилишларга ажратиб бериб юборилган. 9 та ҳолатда 6,91 гектар экин ер майдонлари фуқаролар томонидан ўзбошимчалик билан эгаллаб олиниб, уй-жой ва бошқа ноқонуний қурилмалар қурилишига сабабчи бўлиб, ўз вақтида уларни бартараф этиш чоралари кўрилмагани оқибатида давлат ва жамият манфаатларига 8,08 миллиард сўм зарар етказилган.
Вилоят прокуратураси томонидан 19 декабрь куни мазкур ҳолат юзасидан Урганч тумани ҳокимлиги архитектура ва ер ресурслари бўлими мансабдор шахсларга нисбатан Жиноят кодексининг 205-моддаси 2-қисми (ҳокимият ёки мансаб ваколатини суиистеъмол қилиш) ва 207-моддаси 1-қисми (мансабга совуққонлик билан қараш) билан жиноят иши қўзғатилган ва дастлабки тергов ҳаракатлари олиб борилмоқда.
Аввалроқ Тошкентда 352 минг долларга ер сотмоқчи бўлган туман ҳокимлиги мансабдори ушлангани, Андижон шаҳар халқ таълими бўлимида 33,8 миллиард сўм бюджет маблағларини ўзлаштириш ҳолатлари аниқлангани ҳамда Ўзбекистон халқ таълими тизимида 70 миллиард сўмлик ўғрилик ва ўзлаштириш ҳолатлари аниқлангани ҳақида хабар берилганди.
Изоҳ (0)