Ўзбекистонда аҳолининг кам таъминланган, ёрдамга муҳтож қатламини моддий қўллаб-қувватлаш мақсадида «Вақф» хайрия жамоат фонди томонидан хайрия тадбирлари ўтказилиши режалаштирилган. Бу ҳақда «Дарё»га фонд томонидан маълум қилинди.
Хайрия тадбирлари 2020 йил 25—30 декабрь кунлари (6 кун) Қорақалпоғистон Республикаси, вилоятлар ва Тошкент шаҳрининг барча туман ва шаҳарларида ўтказилади.
Республиканинг 360 та зиёратгоҳ ва қадамжоларида Ўзбекистон мусулмонлари идораси раҳбарияти, уламолар, туман ва шаҳар бош имом-хатиблари иштирокида қурбонлик маросимлари ташкил этилади. Қурбонлик сўнгида Қуръони карим тиловат қилинади ҳамда мамлакатнинг тинчлилиги, осойишталиги ва тараққиёти, турли бало ва офатлардан омонда бўлишини сўраб дуолар қилинади.
Республиканинг барча 2079 та масжидида 6 кун давомида хуфтон намозидан кейин жами 12 480 та Қуръони карим хатми амалга оширилади.
«Сирдарё ва Бухоро вилоятларидаги зиёратгоҳларда ҳам Қуръони каримнинг хатми адо этилиб, офатдан зарар кўрган ватандошларимиз ҳаққига эзгу дуолар қилинади», — дейилади фонд хабарида.
Шунингдек, хайрия тадбирлари якунида қадимий анъанага мувофиқ Имом Бухорийнинг «Саҳиҳи Бухорий» китоби иқтидорли имомлар томонидан хатм қилинади. Ушбу маросимнинг якуни Ўзбекистон мусулмонлари идораси раиси, муфтий Усмонхон Алимов томонидан Самарқанддаги Имом Бухорий мажмуасида амалга оширилади.
«Уламолар, имом-хатиблар Қуръони карим ва ‘Саҳиҳи Бухорий’ китобларининг хатми якунида юртимизга тинчлик, хотиржамлик, хонадонларимизга қут-барака, мамлакатимизнинг янада тараққий этишини сўраб дуо ва илтижолар қиладилар», — дейилади хабарда.
«Вақф» фонди томонидан ҳар бир маҳаллада муҳтож оилаларга озиқ-овқат маҳсулотлари тўплами тарқатилади. Имом-хатиблар «Вақф» фондининг ҳудудий вакиллари билан ҳамкорликда муҳтож хонадонларга кириб, хайрияни тарқатади. Жойлардаги «Меҳрибонлик», «Саховат» ва «Мурувват» уйларида ош дастурхонлари ташкил этилиб, маиший техника воситалари тарқатилади.
Изоҳ (0)