Ўзбекистондаги умумий ўрта таълим муассасаларида маданий-маърифий йўналишдаги тадбирлар ҳамда турли тўгарак, сексия ва клублар фаолияти тикланади.
ХТВ матбуот хизматининг маълум қилишича, бу ҳақда халқ таълими вазирининг «Умумтаълим муассасаларида маънавий-маърифий ишларни ва ўқувчиларнинг бўш вақтларини мазмунли ташкил этиш тўғрисида»ги буйруғида белгиланди.
Вазирлик хабарига кўра, ўқувчиларнинг таълим олишига қўшимча шароит яратиш, дарсдан бўш вақтини мазмунли ташкил этиш мақсадида фан тўгараклари, шунингдек, 5 та муҳим ташаббус тўгараклари ҳам тўлиқ фаолият кўрсатади.
Бундан ташқари, ўқувчиларнинг ўқишга бўлган мотивациясини ошириш мақсадида «Йил ўқувчиси», «Синф лидери», «Тадбиркор ўқувчи» акция ва мусобақалари ташкил этилади.
Шунингдек, 21 декабрдан бошлаб республика ихтисослаштирилган давлат умумтаълим мактаблари, Халқ таълими вазирлиги тасарруфидаги барча турдаги мактаб-интернатларда халқ депутатлари туман (шаҳар) Кенгашлари қарори билан ўқувчилар анъанавий тарзда таълим олиши учун барча турдаги мактаб-интернатлар ётоқхонаси фаолияти санитария-эпидемиологик талаблар асосида ташкил этилади. Ота-оналар ихтиёрида ушбу мактабларда фарзандларини анъанавий ёки масофавий таълим шаклини танлаш имконияти қолдирилади.
Эслатиб ўтамиз, Республика махсус комиссиясининг қарори билан 2020 йил 10 июлдан бошлаб ўқув курслари ва ҳар қандай тўгараклар фаолияти тўхтатилганди. 15 августдан бошлаб ўқув курслари ва марказлари фаолиятини қайта йўлга қўйишга рухсат берилди.
Изоҳ (0)