Uzbekistan Airways авиакомпанияси 2020 йил 28 декабрь ва 2021 йил 7 январь кунлари Франкфуртга амалга ошириши керак бўлган парвозларини бекор қилди. Бу ҳақда авиакомпания матбуот хизмати хабар берди.
Маълум қилинишича, бу Республика комиссиясининг коронавирусга қарши кураш бўйича махсус қарорига биноан, коронавирус инфекцияси янги штаммининг аниқланганини инобатга олган ҳолда амалга оширилмоқда.
Таъкидланишича, сўнгги 14 кун давомида Буюк Британия, Италия, Германия, Дания, Австрия, Австралия, Нидерландия мамлакатлари ва Жанубий Африка Республикасида бўлган ҳамда учинчи давлатлар орқали Ўзбекистонга кириб келаётган Ўзбекистон фуқаролари ва фуқаролиги бўлмаган шахслар 14 кун давомида ўз ҳисобидан тегишли меҳмонхонада карантинга олинади.
Авиакомпания юзага келган ноқулайликлар учун узр сўраган ва батафсил маълумотни +998 (78) 140-02-00 телефон рақами орқали ягона алоқа марказидан олиш мумкинлигини эслатган.
Аввалроқ Ўзбекистон COVID-19’нинг янги варианти аниқланган Буюк Британия ва яна етти давлат билан авиарейсларни тўхтатган эди.
Изоҳ (0)