Жанубий Кореяда коронавируснинг учинчи тўлқини кузатилмоқда, янги чекловлар жорий қилинди

Жанубий Корея ҳукумати 24 декабрдан 3 январгача амал қиладиган пандемияга қарши кураш доирасидаги янги чеклов чораларини эълон қилди, деб ёзади «Korrespondent.net».

Жанубий Кореяда COVID-19 коронавирус инфекциясига чалиниш ҳолатлари рекорд даражада кўп қайд этилмоқда. Ҳукумат пандемиянинг учинчи тўлқини бошлангани ҳақида эълон қилиб, қишки байрамлар даврида амал қиладиган қатъий чекловларни жорий қилди. Янги қоидалар орасида беш кишидан кўп одамнинг тўпланишига қўйилган тақиқ ҳам бор.

Жанубий Кореяда 22 декабрь куни коронавирусга чалиниш ҳолатлари сони бўйича антирекорд қайд этилди — бир кеча-кундузда 1092 киши касалланди. Мамлакатда вирусни юқтирганларнинг умумий сони 52 550 кишига етди, сўнгги икки ҳафта ичида улар 13 130 кишига кўпайган. Шу вақтгача 800 га яқин киши вафот этган.

23 декабрь ҳолати бўйича мамлакатда 15 085 бемор фаол коронавирус ҳолатида бўлиб, уларнинг 284 нафари оғир ёки критик ҳолатдадир.

Шу муносабат билан интенсив даволаш учун жойлар етишмаслиги борасида хавотир ҳам кучаймоқда. Жанубий Корея ҳукумати раҳбари Чон Сё Гюн маълум қилишича, ҳукумат айни пайтда коронавирусга чалинганлар учун режалаштирилган ўн мингта қўшимча касалхона койкасидан тахминан саккиз мингтасини таъминлаган.

Вирус асосан аҳоли зич жойлашган пойтахт минтақасида тарқалмоқда, тиббий ходимлар деярли ҳамма жойда қайд этилаётган авж нуқталарни кузатиб боришга бор кучи билан ҳаракат қилмоқда, деб ёзади AP агентлиги.

Жанубий Корея баҳорда карантин чекловларини киритмасдан, касалликнинг жиддий авж олишини тийишга муваффақ бўлганидан кейин пандемияга қарши муваффақиятли кураш борасида намуна бўлиб ҳисобланар эди.

Келаётган Рождество ва Янги йил байрамларини Жанубий Корея фуқаролари биринчи марта экстремал шароитларда ўтказишига тўғри келиши ҳақида мамлакат бош вазири 22 декабрь куни пандемияга қарши кураш бўйича идоралараро комиссия йиғилишида огоҳлантирди.

«Биз учинчи тўлқинни 3-даражали ижтимоий масофаланиш чораларидан кўра анча кучлироқ чекловлар билан енгиш ниятидамиз», — деди Чон Сё Гюн.

24 декабрдан 3 январгача беш кишидан ортиқ одамнинг бир гуруҳ бўлиб йиғилиши тақиқланади, оммабоп сайёҳлик манзиллари, шунингдек, тоғ-чанғи курортлари ва қишки спорт бўйича бошқа объектлар ёпилади.

Пандемиянинг биринчи тўлқини даврида эпидемия ўчоқларига айланган қариялар уйлари ва руҳий касалхоналарга ташриф буюриш ман этилади.

Ресторанларда янада қатъийроқ ижтимоий масофаланиш чоралари амал қилади, байрам чегирмалари даврида ишлашда давом этадиган универмаг ва супермаркетларда эса харидорларнинг ҳарорати ўлчанади ҳамда ичимлик ва егуликларни татиб кўриш тақиқланади.