Қарши тумани ҳокими Мақсуда Мустафоева Зоир Мирзаев у билан маслаҳатлашгандан кейингина такрорий мурожаатнома ҳақида эълон қилганини айтди

Қарши тумани ҳокими Мақсуда Мустафоева вилоят раҳбари Зоир Мирзаев такрорий мурожаатнома бўлиши ҳақида у билан гаплашганидан сўнггина эълон қилганини айтди, дея хабар берди «Дарё» мухбири.

Таъкидланишича, бу ҳақда Қарши туманида бўлиб ўтган матбуот анжуманида маълум қилинган.

Мурожаатнома эълон қилинган сессия сўнгида журналист ва блогерлар билан мулоқот қилган туман ҳокими Мақсуда Мустафоева «Дарё» мухбирининг «Туманда аҳолига ҳокимсиз мурожаатнома йўллангани ижтимоий тармоқларда шов-шувларга сабаб бўлгач, сиздан такрорий мурожаатнома қилиш ташаббуси чиқмадими? Нега айнан вилоят раҳбари Зоир Мирзаевнинг бу ҳақдаги танқидини кутиб турдингиз? Аслида, ҳолат жамоатчилик орасида шов-шувларга сабаб бўлгач, бу ташаббус сиздан чиқиши керак эмасмиди? Бугунги кун раҳбарлари бирор иш қилиши учун Президент танқидини ёки вилоят раҳбари танқидини кутиб туриши шартми?», деган саволига мурожаатномани қайта ўтказиш ўзидан чиққан ташаббус эканлигини айтди.

«Туман аҳолисига ҳокимсиз мурожаатнома қилиниши интернетда унчалик шов-шув бўладиган воқеа эмас. Қолаверса, такрорий мурожаатнома қилиш ўша куниёқ ‘бoльница’да ётганимда айтилган. ‘Орготдел’ билан гаплашиб, ўша куниёқ агар қониқишмаса, қайта мурожаатнома ўтказиб беришимни айтганман. Сиз ўзингизча, бу билан шов-шув ясадим, деяётган бўлсангиз, адашасиз. Чунки халқнинг олдида ҳокимсиз мурожаатнома қилинди, деган гап у даражада қизиқтирадиган ёки уларнинг муаммоларини ечиб берадиган масала эмас», — деди туман ҳокими.

Мақсуда Мустафоева вилоят ҳокими Зоир Мирзаев такрорий мурожаатнома бўлиши ҳақида аввал у билан гаплашганидан сўнг бу ҳақда эълон қилганини айтмоқда.

«Вилоят ҳокимимиз билан ўша куни кўришганимизда мурожаатнома қайта қабул қилиниши ҳақида айтилганди, бундан ўзларининг хабари бор эди. Шу сабабли ўша куни селекторда бу ҳақда айтдилар», — деди Мақсуда Мустафоева.

Эслатиб ўтамиз, 21 декабрь куни Зоир Мирзаев раҳбарлигида ўтказилган йиғилишда вилоят раҳбари Қарши туманида аҳолига ҳокимсиз мурожаатнома йўлланганини танқид қилиб, «Мен бу ҳолатни ҳазм қилолмайман», деганди. Журналист ва блогерлар билан тўғридан-тўғри мулоқотга чиқолмай, ўрнига ўринбосарларини рўпара қиладиган раҳбарларни «Бундай раҳбарлар ё савиясиз, ё саволларга жавоб беришдан қўрқади», деб айтганди.