Ўзбекистонда 2019 йилда «103» тез тиббий ёрдам хизматига дори-дармон учун 26,5 миллиард сўмдан ортиқ маблағ ажратилган, 2020 йилда бу кўрсаткич 75,3 миллиард сўмдан зиёдни ташкил этди. Бу ҳақда Соғлиқни сақлаш вазирлиги хабар берди.
Вазирлик хабарига кўра, ҳозирда ҳар бир чақириқ вақтида дори-дармон учун минимал харажатлар 5000 сўм миқдорида белгиланди. Бу кўрсаткич 2016 йилда 748 сўмни, 2017 йилда 1627 сўмни ташкил этган.
Қайд этилишича, сўнгги йилларда давлат бюджетидан соҳа учун ихтисослаштирилган автотранспорт харид қилиш ва ҳудудларнинг ушбу техникага бўлган эҳтиёжини қоплашга катта эътибор қаратилмоқда. Жумладан, 2019 йилда тез тиббий хизматда ихтисослашган замонавий автотранспортлар сони 2403 тани ташкил қилган бўлса, 2020 йилда уларнинг сони 2746 тага етди.
Бу автотранспорт воситаларининг аксарияти сунъий нафас бериш, ЭКГ аппаратлари, механик сўрғич, дефибриллятор, иммобилизация шиналари билан таъминланган.
Вазирликнинг таъкидлашича, мамлакат бўйлаб тез ёрдам хизматининг рация алоқаси, телефон ва планшет билан таъминланиш даражаси ҳам ошиб бормоқда. Барча тез ёрдам машиналарида қулай алоқани, чақириқлар учун машинани тезкор йўналтиришни таъминловчи GPS тизимини йўлга қўйишга ҳам алоҳида эътибор берилмоқда.
«Эндиликда юртимизда ҳар 13 минг аҳолига битта махсус тез ёрдам машинаси хизмат кўрсатади. Бу борада ривожланган давлатлар тажрибасини кузацак, уларда 20-25 минг кишига битта махсус автотранспорт воситаси тўғри келади», — дейилади ССВ хабарида.
Аввалроқ Ўзбекистонда 2019 йилда йил давомида «103» тез тиббий ёрдам хизмати 10 миллионга яқин чақириқни қабул қилгани, 2020 йилнинг 11 ойи давомида бу кўрсаткич 10 миллиондан ошгани ҳақида хабар берилганди.
Маълумот учун, 2017—2018 йиллар мобайнида Ўзбекистон тарихида биринчи марта тез тиббий ёрдам хизмати учун 1500 та янги ихтисослашган автомашина харид қилинган. 2020 йил январь ойида Тошкентдаги тез тиббий ёрдам хизмати учун хориждан келтирилган 150 та Ford замонавий реанимобили фойдаланишга топширилган. Вилоятларда ҳам шундай тизимни жорий қилиш режалаштирилган.
Бундан ташқари, SamAvto заводида Isuzu D-Max пикаплари негизида тез тиббий ёрдам машиналарини ишлаб чиқарилмоқда. Жиззах автомобиль заводи эса Volkswagen Caddy базасида махсус жиҳозланган тез ёрдам автомобилларини ишлаб чиқармоқда.
Изоҳ (0)