Ўзбекистонда суд ҳукми устидан апелляция ва кассация тартибида шикоят бериш муддатлари узайтирилади. Бу ҳақда 22 декабрь куни Олий суд мутасаддилари иштирокидаги матбуот анжуманида маълум қилинди.
Қайд этилишича, Жиноят-процессуал кодексида биринчи инстанция судининг ҳукми ва ажрими устидан апелляция тартибида шикоят бериш муддати 10 кундан 20 кунга, фуқаролик, маъмурий ва иқтисодий ишлар бўйича апелляция шикоятларини бериш муддатлари 20 кундан 1 ойга қадар узайтирилмоқда.
Бундан ташқари, апелляция тартибида шикоят беришнинг ўтказиб юборилган муддатларини тиклаш асослари кенгайтирилмоқда. Кассация тартибида шикоят бериш муддатлари амалдаги 6 ойдан фарқли равишда 1 йилга ўзгартирилди.
Тикланиши мумкин бўлган муддатга чегара мавжуд эмас, тарафлар ҳар қанча муддат ўтганидан кейин ҳам ўтказиб юборилган муддатни тиклаш тўғрисида судга мурожаат қилиш ҳуқуқи сақланиб қолади.
Изоҳ (0)