Монополияга қарши курашиш қўмитасининг UzAuto Motors иши бўйича апелляцияси қаноатлантирилмагани тўғрисида хабар берилганди. «Миллий тикланиш» партияси раиси Алишер Қодиров қўмита ушбу масалада партия депутатлари олдида ҳисоб бериши мумкинлигини билдирган. Шундан сўнг «Миллий тикланиш» партиясидан Олий Мажлисга сайланган Акмал Саидов партия раҳбари Алишер Қодировни популистликда айблаган эди. 22 декабрь куни Миллий матбуот маркази биносида «Миллий тикланиш» партиясининг бир йиллик фаолияти ҳисоботига бағишлаб ўтказилган матбуот анжуманида депутат Алишер Қодиров UzAuto Motors АЖ атрофидаги танқидларга муносабат билдирди, деб хабар беради «Kun.uz».
Алишер Қодировнинг сўзларига кўра, Ўзбекистондаги автомобиль саноати 1994 йилларда аҳолини иш билан таъминлаш қийин бўлган шароитда, одамларнинг даромад манбаси йўқ пайтда, Асакада автомобиль ишлаб чиқариш заводи қурилиши билан бошланган. У мамлакат иқситодиётига катта мадад кучи сифатида келган ва умидлар сифатида шаклланган. Унинг айтишича, компания Ўзбекистон ялпи ички маҳсулотида 34 триллион сўм қийматлик яратади.
«У ерда 28 минг, ҳатто ундан ортиқ Ўзбекистон фуқаролари меҳнат қилади. Автосаноатда яратилган битта ишчи ўрни турдош 7—8 тагача иш ўрнини пайдо қилади. Масалан, 28 минг одам расман компанияда банд бўлса, яна 250 мингга яқин одам автосаноат учун ишлаб, нон топяпти. Биз Ўзбекистондаги 300 мингга яқин одамнинг нон топиш манбаси ҳақида гаплашяпмиз», — дейди Қодиров.
Алишер Қодиров одамларнинг автомобиль нархи, хорижий машиналарга ўрнатилган баланд бож тўловларига ҳам тўхталиб ўтган: «Автосаноатни ҳеч ким осонликча ривожлантирмаган. Автосаноати мавжуд давлатлар эса рақобатда кучли бўлади. Негаки, ушбу саноат илмий-технологик ривожланишга ҳам туртки беради. Бож масаласида эса бир нечта давлатлар тажрибасига қарасак, Япония ва Жанубий Корея 80 йилларгача ички бозорни тамоман ёпиқ тутган. Мана шу сиёсатнинг натижаси нимага олиб келди? Ҳозир бу давлатларда ишлаб чиқарилган машиналар жаҳон бозорида сотилмоқда. Улар бунга бир кунда эришмади, балки маълум бир муддат ички бозорни ҳимоя қилди. Бизнинг тушунчамиз бўйича рақобатга эътибор қилмади».
«Автомобильни ҳар йили 300 мингга яқин одам сотиб олади. Биз 300 минг одамнинг манфаатини кўзлаб, 35 миллион халқ яшаётган мамлакат иқтисодиётини хавфга қўя олмаймиз. Бу тамоман ёпилишга ишора қилмайди, биз ҳам миллий заводнинг рақобатбардош бўлишини истаймиз. Ўзбекистон Жаҳон савдо ташкилоти аъзоси эмас, лекин Киото пактига қўшилдик. Бу божларни мувофиқлаштириш иши бошланганини англатади», — деди у.
«Миллий тикланиш» етакчиси партия миллий ишлаб чиқарувчилар манфаатини ҳимоя қилишини эслатиб ўтган: «Ўзбекистонда автосаноат ривожланишда ҳалигача давом этяпти. У ерда қабул қилинаётган айрим қарорларни яхши иқтисодчилар ҳам тушунмайди. Масалан, парламентда давлат бюджети қонуни лойиҳаси муҳокама этилганда етакчи партия депутати автосаноатга берилган 500 миллиард сўмлик солиқ имтиёзини шубҳа остига олди. Шу солиқ имтиёзи нега берилганини раҳбарият яхши англайди, бунинг ортида иқтисодий манфаатлар бор. Аниқ иқтисодий ҳаракат борки, шу саноатни ривожлантириш керак».
«Агар махфийлик бўлса, демак махфийлик асоси бор. Бундан ташқари, автосаноат бозорида рақобат кучли. У ерда нархларнинг шаклланиши билан боғлиқ тижорий сирларни очиқламаслик жамият низоми ва қонунларда ҳам белгиланган», — дея қўшимча қилди у.
Мавзуга доир: Суд тугади, муаммо эса қолди. UzAuto Motors ва Аксилмонополия қўмитаси баҳси атрофидаги муҳокамалар
Бобур Каримов сиёсатчининг гапларидан ҳайратга тушганини билдирган: «Бутун бошли бир партиянинг раҳбари, озгина бўлса-да, гапирадиган мавзусини тушунса, барча учун манфаатли бўларди». Бобур Каримовнинг ушбу сўзларидан бир кун ўтиб, Алишер Қодиров юқорида айтиб ўтилганидек қўмитадан ҳисоб сўрашини айтиб чиқди.
Изоҳ (0)