Сурхондарё вилояти ҳокими Тўра Боболов бошчилигидаги делегация Ўзбекистон ва Афғонистон ўртасида трансчегаравий савдони ривожлантириш бўйича ишчи комиссиясининг иккинчи мажлисида иштирок этиш учун 22 декабрь, сешанба куни Афғонистоннинг Балх вилоятида бўлди. Бу ҳақда вилоят ҳокимлиги ахборот хизмати хабар берди.
Балх вилояти маркази Мозори Шариф шаҳрида Ўзбекистон делегацияси шарафига расмий қабул маросими ўтказилган.
Мулоқот асносида Тўра Боболов ҳамда Балх вилояти волийси Муҳаммад Фарҳод Азимий икки давлат раҳбарларининг сиёсий иродаси туфайли ўзаро дўстлик, қардошлик ва иқтисодий ҳамкорлик сезиларли даражада ривож топаётгани, мамлакатлар ўртасида трансчегаравий савдони ривожлантириш бўйича ишчи комиссиясининг навбатдаги мажлиси бу муносабатларда янги саҳифа очишини таъкидлаб ўтган.
Маълумот учун, Сурхондарё вилоятида қўшни мамлакат сармоядорлари иштирокида 268 та қўшма ҳамда хорижий корхона фаолият юритмоқда. 2020 йилнинг ўтган даврида афғонистонлик тадбиркорларнинг 13 миллион АҚШ долларлик сармояси вилоят қишлоқ хўжалиги, саноат ва хизмат кўрсатиш соҳаларига жалб этилган.
Шунингдек, вилоят корхоналари томонидан 42 миллион доллар қийматидаги маҳсулотлар Афғонистонга экспорт қилинган. Унинг 30 миллион АҚШ долларини 41 минг тонна қишлоқ хўжалиги маҳсулотлари ташкил этади.
Вилоятда 2020–2021 йилларда афғонистонлик ишбилармонлар ҳамкорлигида саноат, хизмат кўрсатиш ва қишлоқ хўжалиги тармоқларида барпо этилиши кўзда тутилган 46,8 миллион долларлик 44 та тўғридан-тўғри инвестицион лойиҳа бўйича ишлар давом этмоқда.
Аввалроқ Афғонистонда Ўзбек тили кунига бағишланган байрам тадбирлари биринчи марта давлат миқёсида нишонлангани, Ашраф Ғани Шавкат Мирзиёевга афғонлараро тинчлик жараёнини қўллаб-қувватлаётгани учун миннатдорлик билдиргани ҳамда Ўзбекистон Ҳиротдаги Алишер Навоий мақбарасини таъмирлашда Афғонистон билан ҳамкорлик қилиши ҳақида хабар берилганди.
Изоҳ (0)