Россиянинг Тошкентдаги элчиси Владимир Тюрденев Ўзбекистонда атом электростанциясини қуриш бўйича Россия билан шартнома «деярли тайёр»лиги, фақат техник жиҳатлар қолганини маълум қилганди. «ЎзАтом» агентлиги Россия элчисининг сўзларига муносабат билдириб, ҳозирда Ўзбекистонда биринчи атом электр станциясини қуриш бўйича асосий шартнома юзасидан музокаралар давом этаётганини таъкидлади.

Ҳозирда Ўзбекистон ва Россия томонидан ташкил этилган ишчи гуруҳлар томонидан Ўзбекистонда атом электр станциясини қуриш бўйича асосий шартнома шартларини муҳокама қилиш бўйича доимий музокаралар ўтказиб келинмоқда.

Ушбу шартномани муҳокама қилишда Ўзбекистоннинг миллий манфаатларини инобатга олган ҳолда музокара позициялари ишлаб чиқилган ва ҳимоя қилиб келинмоқда.

Ҳозирда томонлар лойиҳанинг хавфсизлиги ва ишончлилиги ҳамда иқтисодий самарадорлигини ошириш, шунингдек, республиканинг миллий манфаатларидан келиб чиққан ҳолда позицияларини яқинлаштириш бўйича музокараларни давом эттирмоқдалар.

Бундан ташқари, АЭСни жойлаштириш майдончасига тегишли рухсатнома олиш мақсадида объектни жойлаштириш бўйича устувор майдончада кенг кўламли муҳандислик тадқиқот ишлари амалга оширилмоқда ва АЭС қурилиши ҳамда ундан фойдаланишнинг атроф муҳитга таъсирини баҳолаш бўйича ҳужжат ишлаб чиқилган бўлиб, ушбу ҳужжат бўйича ўрнатилган тартибда экспертизадан ўтказиш ҳамда жамоатчилик эшиттирувларини ташкил этиш бўйича режага асосан ишлар олиб борилмоқда.

Танланган майдончада Россия томони билан ҳамкорликда амалга оширилаётган муҳандислик тадқиқот ишлари натижалари АЭС қурилиши бўйича шартнома шартларининг асоси бўлиб хизмат қилади.

«ЎзАтом» агентлиги

Эслатиб ўтамиз, мамлакатдаги илк атом электр станциясини барпо этиш уч босқичда амалга оширилади. Биринчи босқич — 2019—2020 йилларда АЭС қуриладиган жой аниқланади, 2020—2021 йилларда лойиҳанинг техник-иқтисодий асосини ишлаб чиқиш режалаштирилмоқда. 2022 йилдан эса объект қурилишига киришилади. Россия дизайни асосида қуриладиган ушбу АЭС қиймати тахминан 11 миллиард долларга баҳоланган.Аввалроқ МАГАТЭнинг Ўзбекистондаги ядровий инфратузилмани комплекс кўриб чиқиш миссияси 2021 йилга кўчирилгани хабар берилган эди.