Россия коронавируснинг янги, янада юқумлироқ штамми аниқлангани сабабли Буюк Британия билан авиақатновларни вақтинчалик тўхтатди, деб ёзади «РБК». Парвозларга тақиқ 22 декабрь ярим тундан кучга кирди, тегишли қарорни касаллик тарқалишига қарши кураш бўйича тезкор штаб қабул қилди.

Фото: Global Look Press

Ҳозирча парвозлар бир ҳафтага бекор қилинди. Штабдан маълум қилинишича, вируснинг янги мутацияси ҳақидаги ахборот ўрганилмоқда, таҳлилдан сўнг кейинги қарорлар қабул қилинади.

Пандемия даврида Москвадан Лондонга рейсларни Россия авиакомпанияларидан «Аэрофлот» кунига икки марта амалга оширган. Ҳукумат томонидан киритилган тақиқлардан сўнг ташувчи режалаштирилган барча рейслар бекор қилинди. Компания вакилининг «РБК»га маълум қилишича, йўловчиларнинг барчасига чипта учун сарфланган пуллари қайтариб берилади. «Аэрофлот»дан ташқари Wizz Air ва British Airways ҳам Москвадан Буюк Британияга парвозларни амалга оширган.

Ўтган ҳафтада Буюк Британияда коронавируснинг янги варианти аниқланди — дастлабки маълумотларга кўра, у одатдаги коронавирусдан 70 фоизга юқумлироқ, лекин ундан-да хавфлироқ эмас. Бу ҳақда мамлакат бош вазири Борис Жонсон маълум қилди.

Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Аввалроқ Жанубий Африка Республикаси (ЖАР)да ҳам ўхшаш мутациядаги вирус топилгани ҳақида хабар берилган эди. Вируснинг янги варианти ҳозирги вакциналар ҳосил қиладиган иммунитетдан кучлироқ бўлиши мумкин, деган тахминлар учун ҳозирча бирор-бир асос йўқ.

Шу муносабат билан 20 дан ортиқ мамлакат авиақатновларга чекловлар киритди. Австрия, Аргентина, Бельгия, Болгария, Германия, Исроил, Эрон, Ирландия, Италия, Канада, Колумбия, Кувайт, Латвия, Литва, Марокаш, Нидерландия, Руминия, Туркия, Хорватия, Финляндия, Франция, Чили, Чехия, Швейцария, Эстония турли муддатларга Буюк Британиядан парвозларни тўхтатган. Дания вазиятга баҳо бериб, қандай чоралар талаб қилинишини тушуниб олиш учун ўз ҳаво ҳудудини Буюк Британиядан келадиган самолётлар учун 48 соатга ёпиб қўйди. Польша 21 декабрь куни ярим тундан самолётлар парвозини бекор қилди. Рейслар қачон қайта тикланиши номаълум.