Россияда 2020 йилнинг тўққиз ойи давомида чет эл фуқаролари содир этган ЙТҲлар орасида Ўзбекистон фуқаролари улуши юқори бўлди. «Коммерсантъ»нинг ёзишича, улар ҳиссасига жами 3478 та ЙТҲнинг 797 таси тўғри келган.
Бундай маълумотлар Россия Ички ишлар вазирлиги Йўл ҳаракати хавфсизлиги илмий маркази ҳисоботида келтирилган. ЙТҲларнинг 701 тасига қирғизистонликлар, 599 тасига тожикистонликлар, 282 тасига озарбайжонликлар, 280 тасига арманистонликлар сабабчи бўлган.
Энг кўп ўлим ҳолатлари (76 нафар) Тожикистон фуқаролари келтириб чиқарган ЙТҲларда қайд этилган. Ўзбекистонликлар сабабчи бўлган 797 та аварияда 58 киши вафот этган, 1080 киши жароҳатланган.
Хабарда айтилишича, юқоридаги давлатлар фуқаролари томонидан содир этилган ЙТҲларнинг кўплиги маълум даражада Ички ишлар вазирлигининг миграция бўйича маълумотлари билан ўзаро боғлиқ: тўққиз ой ичида 4,15 миллион Ўзбекистон ва Тожикистон фуқаролари ёки барча чет эл фуқароларининг 54 фоизи миграция рўйхатидан ўтган.
Бу вақт давомида Украиндан 612 минг, Қозоғистондан 534 минг, Арманистондан 283 минг, Озарбайжондан 278 минг, Беларусдан 215 минг киши Россияга келган. Шу билан бирга, ИИВ маълумотларига кўра, коронавирус пандемияси сабабли Россияда 2020 йилда мигрантлар сони 9-11 миллиондан 6,3 миллионга камайди.
Бутунроссия ўзбеклар ва ўзбекистонликлар конгресси раиси Иброҳим Худойбердиевнинг билдиришича, Ўзбекистондан бўлган айрим ҳайдовчилар яхшироқ пул топиш мақсадида 14-15 соатдан ишлашларига тўғри келади. Шу билан бирга, ЙТҲларга ҳайдовчилик маданияти ҳам сабаб бўлишини қайд этиб ўтган.
Изоҳ (0)