Шавкат Мирзиёев 2020 йил 12–13 декабрь кунлари Хоразм вилоятига қилган ташрифи чоғида Амударё устида Хоразмни Қорақалпоғистон билан боғлайдиган 413 метрли кўприк, Қораўзак туманидан Шовот туманигача 79 километрли темир йўл қурилиши бўйича топшириқ берган эди.
ЎзАнинг хабар беришича, 22 декабрь куни икки ҳудудни бирлаштирадиган қўшма кўприкка тамал тоши қўйилди. Янги кўприк қурилишнинг бошланганлиги муносабати билан тантанали тадбир ташкил этилди.
Унда Ўзбекистон бош вазирининг биринчи ўринбосари Очилбой Раматов, Хоразм вилояти ҳокими Фарҳод Эрманов, Қорақалпоғистон Жўқорғи Кенгеси раиси Мурат Камалов, Қорақалпоғистон Вазирлар Кенгаши Раиси Қаҳрамон Сариев ва бошқалар сўзга чиқиб, мазкур кўприк нафақат икки ҳудуд, балки мамлакатнинг ижтимоий-иқтисодий ривожида муҳим аҳамият касб этишини таъкидлади.
Бугунги кунда Қорақалпоғистон ҳамда Амударё тумани республиканинг бошқа ҳудудларидан узилиб қолган, шунингдек, темир йўл тармоқларига ҳам тўғридан-тўғри боғланиш имкони мавжуд эмас. Автомобиль транспорти қатнови ҳам чекланган, чунки Амударёдан ўтиш учун фақат понтон кўприкдан фойдаланилади.
Понтон кўприги 1938 йилда қурилган бўлиб, айни пайтда у эскирган ва фойдаланишга яроқсиз ҳолга келиб қолган. Қорақалпоғистон ва Амударё тумани мамлакатнинг бошқа ҳудудларидан транспорт ҳаракати жиҳатидан ажралгани минтақанинг ижтимоий-иқтисодий ривожига салбий таъсир кўрсатибгина қолмай, минтақанинг эҳтиёжлари учун керакли бўлган халқ хўжалиги юкларини ташиш харажатлари эвазига нархларнинг ошишига ва ушбу ҳудудлардан маҳсулот экспорт қилиниши учун 160 километр масофага транспортда қўшимча юришга сабаб бўлади.
Янги кўприкнинг қурилиши Россия ва Қозоғистондан юкларни ташиш масофасини 240 километрга, юкларни ташиш вақтини эса 6 соатга қисқартиради. Шундай қилиб, юк ташиш ҳажми икки баравар кўпаяди ва йилига 25 миллион тоннани ташкил этади. Мамлакатнинг юқоридаги минтақалари ривожланиб бориши билан иқтисодий самарадорлик йилига 100 миллиард сўмга ошади. Бундан ташқари, Қорақалпоғистондан Хоразмга инерт материалларни етказиб бериш харажатлари камаяди, бу эса ижтимоий объектлар ва инфратузилмаларни қуриш харажатларини камайтиради.
Таклиф этилаётган янги кўприкнинг стратегик аҳамияти алоҳида таъкидланган. «Ўзбекистон темир йўллари» томонидан кўприк қуриладиган жойда дарё кенглигининг минимал ўлчамлари, сунъий иншоотлар сони, бузилаётган объектлар сони ва уларнинг тури, шунингдек, коммуникациялар ўтказилишини ҳисобга олган ҳолда амалга ошириладиган лойиҳанинг 4 та варианти ишлаб чиқилди ва улардан энг мақбули танланди.
Хоразм вилоятини Қорақалпоғистон билан боғловчи темир йўл ва автомобиль йўли қўшма кўпригини қуриш ишлари 2022 йил сентябрь ойига якунланиши режалаштирилган.
Аввалроқ Фарғона водийсидан Хоразмга авиақатнов йўлга қўйилиши ҳақида хабар берилганди.
Изоҳ (0)