Қашқадарё вилояти ҳокими Зоир Мирзаев бош вазир Абдулла Ариповга мурожаат қилиб, вилоятда электр энергияси билан боғлиқ вазият ёмонлиги, айрим туманлар электр таъминотида 8-12 соатгача узилиш бўлаётганлигини маълум қилди, дея хабар бермоқда вилоят ҳокимлиги ахборот хизмати.
21 декабрь куни бош вазир Абдулла Арипов раҳбарлигида иқтисодиёт тармоқлари, кўп квартирали турар жойлар, ижтимоий соҳа объектларини қиш мавсумига тайёрлаш ва мавжуд муаммоларни бартараф этишга бағишланган йиғилиш бўлиб ўтган. Йиғилишда Қашқадарё ҳокими Зоир Мирзаев вилоят аҳолисини қийнаб келаётган муаммо бўйича маълумот берган.
«Вилоятимизнинг Ғузор, Чироқчи, Қамаши, Шаҳрисабз ва Китоб туманларида электр энергияси таъминотида 8—12 соатгача режасиз узилишлар кузатилмоқда. Натижада аҳоли томонидан ҳақли эътироз ва норозиликлар кўпаймоқда. Сабаби ушбу ҳудудларда кўпчилик аҳоли тоғли ва қишлоқ жойларда яшайди», — деган Зоир Мирзаев.Ҳокимнинг ушбу мурожаатга жавоб берган бош вазир Абдулла Арипов вазият икки кун ичида ўнгланишига ваъда бериб, режасиз 8—12 соатлаб узилишларни бартараф этиш бўйича масъулларга топшириқ берган.
Аввалроқ Қашқадарёнинг нафақат туманлари, балки маъмурий маркази ҳисобланган Қарши шаҳрида ҳам электр таъминотида олти соатлаб узилишлар бўлаётгани ҳақида хабар берилган эди.
Изоҳ (0)