Ўзбекистонда телеканаллар орқали ҳуқуқни муҳофаза қилувчи органларнинг фоҳишалик билан шуғулланаётганлар ва фоҳишахоналарни фош этишга бағишланган рейд тадбирлари ҳақида репортажлар мунтазам бериб борилади. Унда, жумладан, ҳуқуқбузарлик ҳолатларини содир этиш вақтида қўлга тушган шахслар, хусусан, гумонланувчи аёллар ҳам кўрсатилади.
Гендер тенгликни таъминлаш масалалари бўйича комиссиянинг 21 декабрь куни бўлиб ўтган мажлисида журналистлар бундай рейдлар ҳақидаги репортажларни телеканаллар орқали очиқ кўрсатиш салбий оқибатларга, масалан, эфирга олиб чиқилган аёлларнинг ўз жонига қасд қилиш ҳолатларига сабаб бўлмайдими деган мазмундаги савол билан мутасаддиларга мурожаат қилди.
Ички ишлар вазири ўринбосари Азизбек Икромов Тошкент шаҳрида фоҳишалик масаласи жуда кўпайганини алоҳида таъкидларкан, шу вақтгача телеканаллар орқали кўрсатилган рейд-репортажлар сабаб бирор аёл ўз жонига қасд қилмаганини маълум қилди, дея хабар бермоқда «Дарё» мухбири Миролим Исажонов.
«Тўғриси, Тошкентда фоҳишалик масаласи жуда кўпайган. Спа-салон ва тунги клублар ҳам кўпайиб кетган. Турли ҳуқуқбузарликлар, жиноятчиликка қарши курашиш ва уларнинг олдини олиш мақсадида бу каби тадбирларни ўтказяпмиз ҳамда буни халққа очиқ намойиш қилиб боряпмиз. Керак бўлса, клуб раҳбарларига чора кўряпмиз, аёл ва ёш қизларимизни маъмурий жавобгарликка ҳам тортяпмиз. Шуни алоҳида таъкидламоқчиманки, ўтказилган рейдлар натижасида шу пайтга қадар аёллар орасида бирорта ҳам суиқасд аниқланмаган», — деди вазир ўринбосари Икромов.
Ушбу савол бўйича комиссия раҳбари, Сенат раиси Танзила Норбоева ҳам фикр билдириб, фоҳишалик билан шуғулланишда гумон қилинган хотин-қизларнинг юзини телеканаллар орқали кўрсатиб, «ўлганнинг устига тепган қилиш» шарт эмаслигини алоҳида уқтирди.
«Ёмон йўлга юрган аёлни исм-фамилияси билан ижтимоий тармоқларга қўйишингизга комиссия раиси сифатида сал эътироз билдираман ва қаршиман. Комиссиямизнинг барча аъзолари бунга қарши. Чунки у аёл ҳар хил сабабларга кўра шу йўлга кириб қолган бўлади. Ўлганни устига тепган қилиб, яна унинг юзини кўрсатиб, тармоқларда баттар шарманда қилсак, бу эртага суицид ҳолатига олиб келади. Буни ҳайп қилиш керак эмас. Аввало, ўша аёлнинг муаммосини аниқлаб, уни бартараф этиш бўйича ишлаш лозим», — деди Норбоева хоним.
Изоҳ (0)