Қашқадарё вилоятининг Чироқчи туманидаги аҳоли эътирозига сабаб бўлган симёғочлар янгисига алмаштирилди. Шунингдек, қишлоқдаги масжидга электр токи тортилди. Бу ҳақда «Дарё»га вилоят «Ҳудудий электр тармоқлари» АЖ раҳбари ўринбосари Фаррух Ўралов хабар берди.
Таъкидланишича, Чироқчи туманининг «Қуруқсой» қишлоғи аҳолиси йиллар давомида симёғочлар яроқсизлигидан азият чекиб келган.
«‘Қуруқсой’ қишлоғидаги электр таъминотини яхшилаш мақсадида ҳудуддаги 4,1 км узунликдаги электр тармоғи янгиланди. Шунингдек, мавжуд трансформатор пункти капитал таъмирланиб, 27 дона янги темир-бетон келтирилиб ўрнатилди», — дейди Фаррух Ўралов.
Ҳудуд аҳолисининг маълумот беришича, талабга жавоб бермайдиган симёғочлар алмаштирилгандан сўнг қишлоқда электр токининг узатилиши ҳам яхшиланган.
«Ўзим ва бошқа фуқаролар бажарилган ушбу ишлар учун электр тармоқлари корхонасидан миннатдормиз. Авваллари трансформаторимиз ва электр тармоқларимиз жуда ёмон ҳолатда эди. Энди ҳаммаси замонавий, энг муҳими, хавфсиз бўлди. Трансформаторимизни таъмирлаб, янги электр тармоғи қуриб беришди, бундан ташқари, замонавий ҳисоблагичлар ҳам келтириб, ўрнатишди. Ушбу ишлар амалга оширилгандан сўнг электр таъминотимиз ҳам анча яхшиланди», — дейди ушбу қишлоқда яшовчи Абдинаби Шералиев.
Фаррух Ўраловнинг қўшимча қилишича, ҳудудда шу пайтга қадар электр токисиз фаолият юритган масжидга ҳам электр токи ўтказиб берилган.
Мавзуга доир:
- Қашқадарёлик тадбиркор уч кун электрсиз қолгани сабаб олти мингта товуғидан айрилди
- Келесдаги туғруқхона электр таъминотида узилиш кузатилди. Ҳолат юзасидан изоҳ берилди
- Пахтаободликлар электр токидаги муаммо сабаб «Дарё»га шикоят қилди. Масъуллар эса журналистга мурожаат қилган аҳолини жазолашга уринмоқда
Изоҳ (0)