«Росселхознадзор» Россияга Фарғонадаги еттита корхонадан помидор ва қалампир олиб киришга рухсат берди

«Росселхознадзор» 18 декабрдан бошлаб Россияга Ўзбекистоннинг Фарғона вилоятидаги еттита корхонадан помидор ва қалампир олиб киришга рухсат берди. Бу ҳақда «Ўздавкарантин» матбуот хизмати маълум қилди.

Қайд этилишича, ушбу корхоналар маҳсулотларида 2020 йилда ЕОИИга аъзо давлатларнинг карантин остидаги объектлар, шунингдек, помидорнинг жигарранг буришган вируси аниқланмаган.

Қуйидаги корхоналарга помидор олиб киришга рухсат берилади:

• МЧЖ «Олтин дарахт» (Қуштепа тумани);
• «Фарҳод Ранчо» ФҲ (Қувасой);
• МЧЖ «Фаргона Зиё қурувчи» (Қувасой).

Қалампирни олиб киришга рухсат берилган корхоналар:

• «Янги тўлқин» ФҲ (Олтиариқ тумани);
• МЧЖ «Жилокор Замини» (Данғара тумани);
• МЧЖ «Саодатли Дил Фаровон» (Данғара тумани);
• МЧЖ Йўлдошев Элдор (Бешариқ тумани).

«Ушбу қарор Ўзбекистон Республикаси Вазирлар Маҳкамаси ҳузуридаги Ўсимликлар карантини давлат инспекцияси томонидан ишлаб чиқариш майдонларини ўрганиш ва республиканинг кўрсатилган минтақасидаги иссиқхоналарнинг ҳолатини таҳлил қилиш натижалари тўғрисида берилган маълумот асосида қабул қилинди», — дейилади хабарда.Эслатиб ўтамиз, жигарранг буришган вируси аниқлангани сабабли «Росселхознадзор» 26 ноябрдан бошлаб Фарғона вилоятидан Россияга помидор ва қалампир олиб киришни тақиқлаган эди. Кейинроқ қуритилган ўрик партиясида ҳам хавфли зараркунанда (капр қўнғизи) аниқлангач, «Росселхознадзор» Фарғонадан барча турдаги ўсимлик маҳсулотлари импортини тақиқлади. Россия томони шу каби тақиқларни сўнгги икки ҳафта ичида Навоий ва Қашқадарё вилоятида етиштирилган маҳсулотларга ҳам жорий этган.

Фарғонага вилояти ҳокими Хайрулло Бозоров Россияга юборилган помидордан чиққан касаллик Фарғонадаги бирорта иссиқхонада аниқланмагани ҳақида маълумот берган. Ҳокимнинг таъкидлашича Россиянинг ваколатли органлари томонидан Фарғонада етиштирилган барча қишлоқ хўжалиги маҳсулотлари импортига қўйилган тақиқ вилоятга жуда салбий таъсир кўрсатади — тақиқ олиб ташланмаса, «Фарғонага оғир бўлади».

Аввалроқ «Юксалиш» умуммиллий ҳаракати етакчиси, Олий Мажлис Қонунчилик палатаси депутати Бобур Бекмуродов Россия томонидан Фарғона, Навоий ва Қашқадарё вилоятларида етиштирилган қишлоқ хўжалиги маҳсулотлари импортига қўйилган тақиққа муносабат билдириб, «бундай ҳаракатлар... Жаҳон савдо ташкилотига аъзоликни тезлаштириш лозимлигини яна бир бор эслатаётгани»ни таъкидлаб ўтган эди.