2021 йил 1 январдан Ўзбекистон ташқи ишлар вазирининг ўринбосари Илҳом Неъматов Мустақил Давлатлар Ҳамдўстлиги (МДҲ) Ижроия қўмитаси раиси – Ижрочи котибининг ўринбосари вазифасини бажаришга киришади. Бу ҳақда «Дунё» агентлиги хабар берди.
Илҳом Неъматов Наманган вилоятида туғилган. Фарғона политехника институти ва Москвадаги Дипломатик академияни тугатган.
1992 йилдан буён Ташқи ишлар вазирлиги тизимида фаолият юритиб келмоқда. У тизимда Консуллик бошқармаси бўлим бошлиғи лавозимида иш бошлаган. Турли йилларда Ўзбекистоннинг Ҳиндистон, Россия, АҚШдаги элчихоналарига раҳбарлик қилган, Ташқи ишлар вазирлигининг махсус топшириқлар бўйича элчиси, ташқи ишлар вазирининг ўринбосари, биринчи ўринбосари бўлган.
Иқтисод фанлари номзоди, Ўзбекистоннинг фавқулодда ва мухтор элчиси юқори дипломатик мартабасига эга.
Илҳом Неъматов МДҲ Ижроия қўмитасида иқтисодий ҳамкорлик масалаларини мувофиқлаштириши кутилмоқда.
Эслатиб ўтамиз, шу йилнинг февраль ойида Илҳом Неъматов ташқи ишлар вазирининг биринчи ўринбосарлигидан вазир ўринбосарлигига ўтказилган эди.
Изоҳ (0)