2021-yil 1-yanvardan O‘zbekiston tashqi ishlar vazirining o‘rinbosari Ilhom Ne’matov Mustaqil Davlatlar Hamdo‘stligi (MDH) Ijroiya qo‘mitasi raisi – Ijrochi kotibining o‘rinbosari vazifasini bajarishga kirishadi. Bu haqda “Dunyo” agentligi xabar berdi.
Ilhom Ne’matov Namangan viloyatida tug‘ilgan. Farg‘ona politexnika instituti va Moskvadagi Diplomatik akademiyani tugatgan.
1992-yildan buyon Tashqi ishlar vazirligi tizimida faoliyat yuritib kelmoqda. U tizimda Konsullik boshqarmasi bo‘lim boshlig‘i lavozimida ish boshlagan. Turli yillarda O‘zbekistonning Hindiston, Rossiya, AQShdagi elchixonalariga rahbarlik qilgan, Tashqi ishlar vazirligining maxsus topshiriqlar bo‘yicha elchisi, tashqi ishlar vazirining o‘rinbosari, birinchi o‘rinbosari bo‘lgan.
Iqtisod fanlari nomzodi, O‘zbekistonning favqulodda va muxtor elchisi yuqori diplomatik martabasiga ega.
Ilhom Ne’matov MDH Ijroiya qo‘mitasida iqtisodiy hamkorlik masalalarini muvofiqlashtirishi kutilmoqda.
Eslatib o‘tamiz, shu yilning fevral oyida Ilhom Ne’matov tashqi ishlar vazirining birinchi o‘rinbosarligidan vazir o‘rinbosarligiga o‘tkazilgan edi.
Izoh (0)