Наманганда 2020 йил 16 декабрь куни юз берган мудҳиш автоҳалокат муҳокамасига бағишланган йиғилиш бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Йиғилишда вилоятдаги сектор раҳбарлари, ҳуқуқ-тартибот идоралари, давлат ва жамоат ташкилотлари мутасаддилари, автомактаблар, юк ташиш учун лицензия берадиган ташкилотлар раҳбарлари ва ҳайдовчилар иштирок этди.
Муҳокамада қатнашган Ички ишлар вазирлиги йўл ҳаракати хавфсизлиги бош бошқармаси бошлиғи Олимжон Саидовнинг маълум қилишича, ушбу оғир оқибатли автоҳалокат сабабларини ўрганиш мақсадида республика комиссияси тузилган ва вилоятда ўрганишлар олиб борилмоқда.
Ўрганишлар натижасида дастлабки хулосаларга келинган ва тегишли тавсиялар ишлаб чиқилган. Жумладан, Наманган шаҳридаги ҳодиса юз берган кўчада синов тариқасида светофорнинг ўрни ўзгартирилиб, янги чорраҳа ташкил этилди. Бу ҳудудда йўл ҳаракатини ташкил этиш лойиҳаси қўллаб-қувватланди ва халқ депутатлари навбатдан ташқари сессияси муҳокамасига киритиладиган бўлди.
Шунингдек, юк автомашиналари ортган юк меёрда эканлигини аниқлаш учун тарозидан ўтказилиши алоҳида назоратга олинадиган ва тарозилар сони кўпайтириладиган бўлди.
Эслатиб ўтамиз, Наманганда MAN ва Nexia иштирокида юз берган ЙТҲ оқибатида 6 киши ҳалок бўлган, улардан 4 нафари бир оила вакиллари эди.
Изоҳ (0)