Янги йил байрами арафасида Тошкент—Термиз—Тошкент йўналишида қўшимча поезд қатновлари йўлга қўйилди

«Ўзбекистон темир йўллари» Тошкент–Термиз–Тошкент йўналишида қўшимча йўловчи поезд қатновини амалга оширади.

Қайд этилишича, Янги йил байрами арафасида ва байрам кунлари йўловчиларга транспорт хизматларини кўрсатишни янада ошириш ва уларга кўпроқ қулайлик яратиш мақсадида «Ўзбекистон темир йўллари» томонидан Тошкент–Термиз–Тошкент йўналишида 280/279-сонли йўловчи поездлари қатнови йўлга қўйилди.

Мазкур поездлар 2020 йил 15-, 25-, 27-, 29 декабрь кунлари Тошкент–Термиз, шунингдек, 16-, 26-, 28- ва 30 декабрь кунлари Термиз–Тошкент йўналишида 4 мартадан қатновни амалга ошириб, йўловчиларни ўз манзилларига етказиб қўяди.

Таъкидланишича, чипталарни электрон тарзда ҳам харид қилиш мумкин.

Қўшимча маълумотни Тошкент шаҳридаги 1005 қисқа телефон рақами, жойлардаги темир йўл кассалари ҳамда маълумотлар бюросидан билиб олиш мумкин.

Аввалроқ Москвадан Тошкентга махсус поездлар қатнови йўлга қўйилгани, Бухородан Тошкентга келаётган поезд носозлик сабаб 1,5 соатдан ортиқроқ тўхтаб қолгани ҳамда «Афросиёб» поездининг рейслари сони биттага кўпайгани ҳақида хабар берилганди.