Наманган вилоятининг Чортоқ туманида қалбаки пул ишлаб чиқаришга уринган шахслар қўлга олинди.
ИИВ Тергов департаменти хабарига кўра, 16 декабрь куни Чортоқ туман ИИБ ва ДХХ туман бўлими ходимлари билан ҳамкорлигида ўтказилган тадбирда 38 ёшли Фозилжон А.нинг хонадони кўздан кечирилган. Текширув натижасида хонадон эгаси ва 27 ёшли Раҳимжон А. ўзлари билан олиб келган HP русумли ноутбук, Epson номли рангли принтер ҳамда турли рангдаги бўёқлари, Deli номли ламинация ускунаси, 1 дона соч қуритгич, дазмол ва 4 та қутида А-4 форматдаги қоғозлар, хонадон гилами остидан А-4 формат қоғозга чиқарилган 50 минг сўмлик купюрадаги 18 дона, 100 минг сўмлик купюрадаги 4 дона қалбаки пуллар баённома орқали ашёвий далил тариқасида расмийлаштириб олинган.
Ҳолат юзасидан Чортоқ туман ИИБ ҳузуридаги Тергов бўлинмаси томонидан уларга нисбатан Жиноят кодексининг 176-моддаси 2-қисми «в» банди (бир гуруҳ шахслар томонидан олдиндан тил бириктириб қалбаки пул ясаш, уларни ўтказиш) билан жиноят иши қўзғатилиб, гумон қилинувчилар процессуал тартибда ушланган.
Ҳозирда жиноят иши бўйича тергов ҳаракатлари олиб борилмоқда.
Юз минг сўмлик купюра 2019 йилнинг 25 февралидан бошлаб муомалага чиқарилганди. Уни қалбакилаштириш ҳолатлари аввал ҳам кўп қайд этилган. Хусусан, Тошкент, Самарқанд, Андижонда қалбаки купюраларни бозорда муомалага киритмоқчи бўлган шахслар қўлга олинган.
Изоҳ (0)