Namangan viloyatining Chortoq tumanida qalbaki pul ishlab chiqarishga uringan shaxslar qo‘lga olindi.
IIV Tergov departamenti xabariga ko‘ra, 16-dekabr kuni Chortoq tuman IIB va DXX tuman bo‘limi xodimlari bilan hamkorligida o‘tkazilgan tadbirda 38 yoshli Foziljon A.ning xonadoni ko‘zdan kechirilgan. Tekshiruv natijasida xonadon egasi va 27 yoshli Rahimjon A. o‘zlari bilan olib kelgan HP rusumli noutbuk, Epson nomli rangli printer hamda turli rangdagi bo‘yoqlari, Deli nomli laminatsiya uskunasi, 1 dona soch quritgich, dazmol va 4 ta qutida A-4 formatdagi qog‘ozlar, xonadon gilami ostidan A-4 format qog‘ozga chiqarilgan 50 ming so‘mlik kupyuradagi 18 dona, 100 ming so‘mlik kupyuradagi 4 dona qalbaki pullar bayonnoma orqali ashyoviy dalil tariqasida rasmiylashtirib olingan.
Holat yuzasidan Chortoq tuman IIB huzuridagi Tergov bo‘linmasi tomonidan ularga nisbatan Jinoyat kodeksining 176-moddasi 2-qismi “v” bandi (bir guruh shaxslar tomonidan oldindan til biriktirib qalbaki pul yasash, ularni o‘tkazish) bilan jinoyat ishi qo‘zg‘atilib, gumon qilinuvchilar protsessual tartibda ushlangan.
Hozirda jinoyat ishi bo‘yicha tergov harakatlari olib borilmoqda.
Yuz ming so‘mlik kupyura 2019-yilning 25-fevralidan boshlab muomalaga chiqarilgandi. Uni qalbakilashtirish holatlari avval ham ko‘p qayd etilgan. Xususan, Toshkent, Samarqand, Andijonda qalbaki kupyuralarni bozorda muomalaga kiritmoqchi bo‘lgan shaxslar qo‘lga olingan.
Izoh (0)