Шерзод Шерматов 2030 йилгача Ўзбекистон таълим бериш сифати бўйича Топ-30 таликка кириши кўзда тутилганини маълум қилди

2020 йилнинг 18 декабрь куни бўлиб ўтган «Тошкент ёшлар форуми – 2020»да «Ижтимоий соҳа – 2030: таълим ва соғлиқни сақлаш тизими истиқболлари» мавзусида очиқ мулоқот ҳам ташкил этилди.

«Дарё» мухбирининг хабар беришича, учрашувда Халқ таълими вазири Шерзод Шерматов таълим бериш жараёнидаги ислоҳотлар, режалар ва муваффақиятга эришиш бўйича ўз тавсияларини ёшлар билан ўртоқлашди.

«Таълимнинг асосий вазифаси — ёшларни келажакда муваффақиятга тайёрлашдан иборат. Муваффақият бу — ўз олдингизга қўйган мақсадингизга қонунни бузмасдан, ҳеч кимнинг ҳуқуқларини поймол қилмасдан эришишдир. Бу ерда ўтирганларнинг ҳаммасида ўз муваффақиятига эришиши учун имконияти етарли», – деди Шерзод Шерматов.

2030 йилгача Ўзбекистон таълим бериш сифати бўйича жаҳонда Топ-30 та мамлакатлари қаторига кириш вазифаси кўзда тутилган

«Бунга қандай эришиш мумкин? Энг аввало, мактаблардаги шарт-шароитларни янада яхшилаш лозим. Бир неча йиллар олдин мактаблардаги шароитлар жуда ачинарли аҳволда эди. Ҳаттоки пойтахт мактаблари шароити мақтагулик эмасди. Бу бўйича қиладиган ишларимиз ҳали жуда кўп. Иккинчидан, ўқитувчиларни жамоавий ишлар ва ортиқча қоғозбозликлардан халос этиш зарур. Педагоглар малакаси секин-асталик билан ошиб боряпти. Онлайн платформаларда дарс ўтишяпти, янги билимларни эгаллашмоқда», – деди халқ таълими вазири.

Вазирнинг қўшимча қилишича, ота-оналарнинг таълимга бўлган муносабати ҳам ўзгарди. Фарзанди келажаги учун таълимда бўлаётган ислоҳотларга қизиқиш билдиряпти.

«Лекин, умуман олганда, жамиятда таълимга нисбатан муносабат ўзгариши керак. Ёшларнинг ўзи ўзгармаса, билим олишга иштиёқи бўлмаса, мақсадларга эришишимиз қийинлашади», — деди Шерзод Шерматов.