Тошкент шаҳрида барпо этилаётган ерусти метро ҳалқа йўли «Ўзбекистон мустақиллигининг ўттиз йиллиги» деб номланади. Бу Президентнинг «Ўзбекистон давлат мустақиллигининг ўттиз йиллик байрамига тайёргарлик кўриш ва уни юқори савияда ўтказиш тўғрисида»ги қарорида белгиланган.
Қарорга кўра, Ўзбекистон давлат мустақиллигининг ўттиз йиллик байрамига тайёргарлик кўриш ва уни юқори савияда ўтказиш бўйича республика комиссияси ташкил қилинади.
Шунингдек, Тошкентда «Истиқлол» мажмуаси ташкил этилиб, у ерда мустақилликнинг мазмун-моҳияти ва тарихий аҳамиятини акс эттирадиган ёдгорлик композицияси барпо этилади.
Шу билан бирга, Ўзбекистоннинг янги тараққиёт даври ва ривожланиш истиқболлари мавзусида халқаро илмий-амалий конференция ташкил этилади. Ўтган даврда эришилган ютуқларга бағишланган «Янги Ўзбекистон» китоб-альбоми ва тўпламлар нашр қилинади.
Бундан ташқари қарорда қуйидагилар белгиланган:
- 2021 йилда мамлакатда ўтказилиши режалаштирилган барча халқаро маданий-маърифий тадбирлар, спорт мусобақалари, илмий конференциялар, аждодлар юбилей саналарини мустақилликнинг ўттиз йиллиги ғояси ва руҳи билан уйғун ва ҳамоҳанг ҳолда ташкил этиш;
- маданият ва санъатнинг барча йўналишлари (мусиқа, театр, кино, тасвирий ва амалий санъат, цирк, халқ ижодиёти) бўйича республика миқёсида фестиваль ва кўргазмаларни ташкил этиш;
- Ўзбекистон мустақиллигини тараннум этадиган энг яхши қўшиқ ва мусиқа асарлари ҳамда тарихий ва замонамиз қаҳрамонлари ҳаёти ва фаолияти ҳақидаги пьесалар танловларини ташкил этиш;
- мустақиллик йилларида эришилган илмий ютуқлар асосида яратилган инновацион лойиҳа ва технологиялар кўргазмаларини ўтказиш ҳақидаги таклифларни маъқуллаш.
Изоҳ (0)