«Умумий харажат ҳозирча аниқ эмас». Жаҳонгир Ортиқхўжаев Тошкент Ёшлар форуми учун бюджетдан қанча маблағ сарфланиши ҳақида маълумот берди

Тошкентда шаҳар ҳокимлиги томонидан Ёшлар ишлари агентлиги ва Ўзбекистон Ёшлар иттифоқи билан ҳамкорликда ўтказиладиган Ёшлар форуми учун қанча харажат қилиниши ҳозирча аниқ эмас. Бу ҳақда 18 декабрь куни форумнинг очилишига бағишланган матбуот анжуманида Тошкент шаҳар ҳокими Жаҳонгир Ортиқхўжаев маълум қилди, дея хабар бермоқда «Дарё» мухбири.

Тошкент Ёшлар форуми доирасида икки кун вазирлик ва идораларнинг раҳбарлари, блогерлар, TikTok ва Instagram юлдузлари билан учрашувлар очиқ мулоқотлар ташкил этилиши кўзда тутилган. Шунингдек, ҳоким Жаҳонгир Ортиқхўжаевнинг алоҳида тақдимоти режалаштирилган. Форумнинг учинчи кунида «кўча спорти» мусобақасининг республика босқичи ўтказилиши режалаштирилган. Форум 21 декабрь Humo Arena’даги гала-концерт билан ёпилади.

Жаҳонгир Ортиқхўжаевнинг маълум қилишича, «бир ойлик тадбирлар учун совғалар бериш, турли ютуқларни қўйишга маҳаллий бюджет ҳисобидан 2 миллиард сўм ажратганмиз». «Бу форум учун жами харажатнинг 30 фоизини ташкил қилади. Бундан ташқари, бир қанча ҳомийларни ҳам бу ишга жалб қилганмиз. Умумий харажат ҳозирча аниқ эмас. Чунки ҳомийлар томонидан кўп ёрдам берилди ва ҳали ҳам давом этяпти», — деди пойтахт ҳокими.

Шаҳар ҳокими ўринбосари Дурдона Раҳимованинг сўзларига кўра, ҳозирга қадар Ёшлар ойлиги доирасида қатнашган 347 минг нафар йигит-қизлардан 7 минг нафари рағбатлантирилган. Уларга ўз соҳасида керак бўладиган анжомлар, спорт ва мусиқа инвентарлари, имконияти чекланган ёшларга зарур ускуналар тақдим этилган.

«Маҳаллий бюджет учун пулни, шунчаки ўзимиз қарор чиқариб эмас, маҳаллий кенгаш депутатлари олдида ҳимоя қилгандан кейин оламиз. Ҳар бир олинадиган совға, ҳар бир харажатни уларга тақдимот қилиб, исботлаб тушунтириб, кейин оламиз. Бугунги кунда жамоатчилик назорати кучайиб бормоқда. Эртага барибир бу харажатларимиз ижтимоий тармоқларда ўз аксини топади. Биз бу харажатлар нима учун ишлатилганини ипидан игнасигача тушунтириб беришга тайёрмиз», — деди Раҳимова хоним.