Ўзбекистонда тиктокерларга тақиқ қўйиш эмас, балки уларни тўғри йўлга йўналтириш бўйича иш олиб бориш керак. Бу ҳақда Тошкент шаҳар ҳокими Жаҳонгир Ортиқхўжаев 18 декабрь куни Тошкент Ёшлар форумининг очилишига бағишланган матбуот анжуманида фикр билдирди, дея хабар бермоқда «Дарё» мухбири.
Форум дастурига кўра, 19 декабрь куни Tashkent City Congress Hall’нинг «Сағбон дарвоза» залида TikTok ва Instagram юлдузлари билан учрашув бўлиб ўтади. Матбуот анжуманида журналистлар бу учрашувдан нима мақсад кўзланган, деган савол билан мутасаддиларга мурожаат қилган.
TikTok’ни интернет оламининг бир қисми деб биламан. Интернетда блогерлар ҳам бор, журналистлар ҳам бор, тиктокерлар ҳам бор. Уларни бир-биридан, яъни этни тирноғидан ажратиб бўлмайди. Юртимизда тиктокерларга тақиқ қўйиш эмас, уларни тўғри йўлга йўналтириш бўйича иш олиб боришимиз керак. Ёшларга тўғри йўл кўрсатиб, уларга тўғри йўналиш кўрсатиб, қилаётган ишларидан самарали фойдаланса бўлади, деб ўйлайман.Менимча, ҳар нарсага тақиқ қўйиш ривожланаётган демократик давлатга ҳос нарса эмас. Улар билан бирга ишлаймиз, уларга таянч бўламиз, уларни ҳимоя қиламиз. Бугун аҳамиятсиз бўлиб кўринаётган тиктокерлар эртага аҳамиятли шахсга айланиб қолиши ҳеч гап эмас. Биз уларнинг ёнларида таянч бўлсак, бас.
Жаҳонгир Ортиқхўжаев, Тошкент шаҳар ҳокими
Изоҳ (0)