Ўзбекистон Давлат активларини бошқариш агентлиги Coca-Cola Ichimligi Uzbekiston Ltd МЧЖ устав капиталидаги 57,118 фоиз улушини ошкора сотув жараёни орқали сотиш истагини эълон қилди.
Ушбу битим доирасида Давлат активларини бошқариш агентлигининг эксклюзив молиявий маслаҳатчиси вазифасини Rothschild & Cie бажаради.
Coca-Cola Ichimligi Uzbekiston Ltd МЧЖнинг бозордаги улуши 2019 йилда қарийб 47 фоизни ташкил этган бўлиб, Ўзбекистондаги газланган алкоголсиз ичимликларнинг энг йирик ишлаб чиқарувчиси ҳисобланади.
Coca-Cola Ichimligi Uzbekiston Ltd’нинг ишлаб чиқариш қувватлари Тошкент, Наманган ва Урганчдаги учта корхонадан иборат. Шунингдек, жамият замонавий омборхоналар тармоғига эга. Бундан ташқари, Самарқандда янги корхонани қуриш режалаштирилган.
2019 йил 31 декабрда якунланган ўн икки ойлик даврда жамиятнинг даромади 1,4 триллион сўмни ташкил этган ва бу кўрсаткич 2018 йил 31 декабрь ҳолати бўйича қарийб 46 фоиз ўсишни кўрсатган.
Маълумот учун, МЧЖнинг устав капиталидаги 42,882 фоиз улуш The Coca-Cola Export Corporation (АҚШ) компаниясига тегишли.
Эслатиб ўтамиз, 2018 йилда Ўзбекистон ҳукумати Coca-Cola Ichimligi Uzbekiston Ltd МЧЖ ҚКдаги улушини хорижий инвесторга сотмоқчи эканлиги маълум қилинган эди. Европа тикланиш ва тараққиёт банки битимда воситачи сифатида иштирок этиши керак эди. Бироқ кейинроқ мамлакат ҳукуматининг устувор режалари ўзгаргани сабаб жараён тўхтаб қолган эди. 2020 йилнинг март ойида эса Coca-Cola Ўзбекистонга 31 миллион доллар инвестиция киритишни режалаштираётгани, июнь охирларида эса Coca-Cola компанияси оммавий савдолар асосида хусусийлаштирилиши тўғрисида хабар берилганди. Шу йилнинг августида эса Coca-Cola’нинг давлат улуши иккинчи маротаба сотувга қўйилганди.
Изоҳ (0)