Ўзбекистонда 2028 йилгача аҳолини қаттиқ маиший чиқиндиларни тўплаш ва олиб чиқиб кетиш бўйича хизматлар билан қамраб олиш кўлами 100 фоизга етказилади. Бу ҳақда 14 декабрь куни Олий Мажлис Сенатининг Аграр, сув хўжалиги масалалари ва экология қўмитасининг навбатдаги мажлисида сенатор Баҳодир Тўйчиев айтиб ўтди.
Таъкидланишича, ҳозирда барча ҳудудларда чиқиндилар билан боғлиқ ишларни амалга ошириш бўйича тегишли инфратузилма яратилмоқда. Бугунги кунда санитар тозалаш соҳасида 13 та «Тоза ҳудуд» ДУК ва уларнинг 174 та филиали, «Махсустранс» ДУК ҳамда 101 та хусусий корхона фаолият кўрсатиб келмоқда.
«Сўнги йилларда нафақат бизда, балки бутун дунёда экология борган сари бузилиб бормоқда. Экология бу – биз деганимиз. Яъни биз экологияга қанчалик зарар етказсак, ўзимизга шунчалик ёмонлик қилган бўламиз. Сабаби эса барчага маълум. Биз экологияни ҳеч бўлмаганда келажак авлод учун, фарзандларимиз учун асрашимиз керак. Уни авайлаш, асраш бурчимиз эканлигини тушуниб етишимиз керак», – деди Баҳодир Тўйчиев.
Маълум бўлишича, биргина Тошкент шаҳрининг ўзидан бир йилда 750 минг тоннадан ортиқ чиқинди чиқади. Чиқиндиларнинг чиқинди полигонларига етиб боргунича турли сабабларга кўра йўлда 30 фоизи камаяди. Чиқинди полигонлари эса борган сайин тўлиб бормоқда.
Шундай салбий ҳолатларнинг олдини олиш ва экологияни яхшилаш мақсадида 2028 йилгача чиқиндиларни бошқариш соҳасида қатор ишлар амалга оширилиши режалаштирилган. Жумладан:
- аҳолини қаттиқ маиший чиқиндиларни тўплаш ва олиб чиқиб кетиш бўйича хизматлар билан қамраб олиш кўламини 100 фоизгача етказиш;
- ҳосил бўлган қаттиқ маиший чиқиндиларнинг камида 60 фоизини қайта ишлаш;
- ўзига ҳос қаттиқ маиший чиқиндиларни (таркибида симоб бўлган чиқиндилар, автошиналар, аккумуляторлар, ишлатилиб бўлинган мойлар, қадоқлаш чиқиндилари ва ҳ.к) қайта ишлаш ҳажмини 25 фоизгача ошириш;
- полигонларга кўмиш учун йўналтириладиган қаттиқ маиший чиқиндилар ҳажмини 60 фоизгача камайтириш;
- барча полигонлар ҳолатини ўрнатилган талабларга мувофиқлаштириш, ёпилган полигон ерларини тўлиқ рекультивация қилиш;
- қаттиқ маиший чиқиндилар билан боғлиқ ишларни амалга ошириш объектларида муқобил энергия манбаларидан 35 фоизгача фойдаланиш кўзда тутилган.
Изоҳ (0)