Андижонда етиштирилган гилослар 2021 йилдан Хитойга экспорт қилинади

Андижонда йил давомида етиштирилган гилослар қайта ишланиб, қадоқланиб, Хитойга экспорт қилинади, дея хабар берди «Дарё» мухбири Умиджон Мамарасулов.

Маълум бўлишича, 16 декабрь куни Андижон вилояти ҳокими Шуҳрат Абдураҳмонов вилоят халқига мурожаатномасида бу ҳақда гапириб ўтган.

Маълум қилинишича, вилоятда 2020 йилда жами 156 минг 160 гектар майдонга такрорий экинлар экилиб, жами 1 миллион 936 минг тонна маҳсулот етиштирилган. Жумладан, 388,2 минг тонна мева, 57,3 минг тонна узум, 1 миллион 107 минг тонна сабзавот, 142,5 минг тонна полиз, 241 минг тонна картошка маҳсулотлари етиштирилган ва экспортга йўналтирилган.

«12 ноябрь куни Ўзбекистон Республикасининг Хитой Халқ Республикасидаги фавқулодда ва мухтор элчиси Бахтиёр Саидов ва Хитой Халқ Республикаси ҳукумати билан онлайн учрашув ўтказдик. Учрашувда ‘Шанхай халқаро агросаноат холдинг’ компанияси билан ҳамкорликда йил давомида гилос етиштириш ва уни қайта ишлаш, қадоқлаш бўйича келишиб олдик. Келгуси йилда вилоятимиздан Хитойга гилос экспортини йўлга қўямиз. Шунингдек, ‘Цзефан Хунсин’ Пекин транспорт ускуналари компанияси билан эса логистика маркази ташкил этиш лойиҳаларини амалга ошириш юзасидан умумий қиймати 500 миллион долларлик лойиҳалар бўйича келишув шартномалари имзоладик», — деган Шуҳрат Абдураҳмонов вилоят халқига қилган мурожаатида.