Қарши тумани ҳокими Мақсуда Мустафоевасиз ўтган Халқ депутатлари туман кенгашининг навбатдаги сессиясида сўз олган депутат Нарзулла Намозов туман кенгаши депутатлари фақат қўл кўтариб тасдиқловчи эканлигини тан олди, дея хабар берди «Дарё» мухбири.
«Хафа бўлманглар-у, ҳаммамиз ухлаб ётибмиз. Қарши тумани депутатлари ҳам бошқаси ҳам. Номига юрибмиз-да. Тошкентда шунақа ишлар бўляптики, Қарши тумани Тошкентдан 30 йил ортга қолиб кетганмиз. Фақат келамиз, қўл кўтарамиз, нима бўлиб, нима қўяётганини ҳам билмаймиз», — деди Халқ депутатлари туман кенгаши депутати Нарзулла Намозов.
Депутатнинг айтишича, тумандаги уйлар, ижтимоий соҳа объектлари жуда сифатсиз қурилмоқда. Депутатлар эса буни назорат қилишни унутган.
«Боғча қурамизми, мактаб қурамизми — ҳаммаси сифатсиз. Ана Тошкентдан бориб ўрганайлик. Шуни нега биз депутатлар назорат қилмаймиз. Халқ сайлаган депутатлармиз-ку. Илтимос, номига депутат бўлмайлик. Ҳозир ухлайсизлар, кейин уйга қайтасизлар. Ана қурувчи билганини қуряпти. Ўша уйларда ким яшайди? Сиз билан биз-ку», — дея фикр билдирган депутат.
Нарзулла Намозов туман кенгаши депутатлари иштирокида сессия ташкил қилиб, сессияга қурувчиларни таклиф қилиш лозимлигини билдирган.
«Депутатларни сессияга чақириб, 2021 йилда нима қурилади, қанча уй қурилади, қандай қурилади? Шуни назоратга олишимиз керак. Сал эътиборга олсак, ўша қурувчи ҳам сесканади-да, чиройли қуради. Борсин депутатлар ўтириб, тайёр бўлган уйни қабул қилсин», — деган депутат.
Депутатнинг айтишича, тумандаги мавжуд мактабларнинг бирортасида етарли даражада шарт-шароит йўқ. Куни кеча депутатлар иштирокида мактаблар кўздан кечирилган. Бироқ хўжакўрсинга.
«Биз кўп мактабларга бордик. Ўзи номига бориб, номига кўриб келдиг-у, бирорта мактабда шароит йўқ. Мактаб ҳожатхонаси бир километр нарида, мактаб ўқувчиларида ҳатто ўйнайдиган тўп ҳам йўқ. 44-мактабга бордикми? ‘Столба’си йиқилай деяпти. Бирорта боланинг устига тушиб кетса-чи? Ҳеч ким қизиқмайди бу билан», — дея куйиниб гапирган депутат.
Ачинарлиси, сессияда шунча эътироз билдирилса-да, депутатлардан масъулларга бирорта ҳам савол берилмаган. Энг ёмони, депутатлар масъулларнинг ОАВ вакиллари билан бўлган мулоқотини ҳам тинглашни истамай, сессиядан сўнг зални тарк этган.
Эслатиб ўтамиз, Қарши туман кенгаши депутати Дилором Тилакова Халқ депутатлари туман кенгашининг 2020 йил сентябрь ойидаги сессияси ҳақида гапириб, сессия пайтида хонага кириб-чиқиб юргани учун сессиядаги масала моҳиятини унчалик ҳам тушунмаганини айтиб, туман сессиясининг одатда қандай ўтишини ошкор қилганди.
Изоҳ (0)