Тошкентнинг Сергели туманида пиротехника буюмларининг қонунга хилоф муомаласи билан шуғулланган 29 ёшли йигитга жиноят иши қўзғатилиб, қамоққа олинди. Бу ҳақда Тошкент шаҳар ИИББ хабар берди.
Қайд этилишича, 29 ноябрь куни, тахминан, соат 23:50 да ИИББ ходимлари Mercedes-Benz Вито автомобили ҳайдаб кетаётган фарғоналик 29 ёшли О.I.ни тўхтатган. Холислар гувоҳлигидаги текширув натижасида автомобиль юкхонасидан жами 72 миллион сўмлик 11 қути пиротехника буюмлари топилган.
Ҳолат юзасидан Сергели тумани ИИО ФМБ 4-сон ИИБ ТБ томонидан Жиноят кодексининг 250-1 (пиротехника воситаларининг қонунга хилоф муомаласи) моддаси бўйича жиноий иш қўзғатилган ва О.I.га нисбатан қамоққа олиш эҳтиёт чораси қўлланилган.
Айни пайтда тергов ишлари давом этмоқда.
Хабарга кўра, жами профилактик тадбирлар давомида 25 ноябрь куни Тошкент шаҳар ИИББ ходимлари бошқа ҳуқуқни муҳофаза қилиш органлари билан ҳамкорликда пиротехника буюмларининг ноқонуний савдоси билан боғлиқ 120 дан ортиқ факт аниқлади. 870 дан ортиқ сертификатланмаган пиротехника буюмлари олиб қўйилди. Ҳуқуқбузарликларга алоқадор 115 нафар шахсга нисбатан қонуний чоралар кўрилди. Суд 13 та ҳуқуқбузарга нисбатан маъмурий қамоқ жазосини белгилади, 3 нафар фуқарога нисбатан жиноий иш қўзғатилди, қолган 108 киши жаримага тортилди.
Аввалроқ Андижон ва Самарқандда ноқонуний пиротехника воситалари савдосига чек қўйилгани, Оҳангаронда ноқонуний тарзда 6800 қутига яқин пиротехника воситалари олиб кетаётган юк машинаси аниқлангани хабар берилган эди.
Изоҳ (0)