Сирдарё вилояти Гулистон ва Сирдарё туманларида фуқароларни ишга киритиб қўйиш эвазига пора олаётган тиббиёт бирлашмаси ходимлари қўлга олинди.
Қайд этилишича, Гулистон тумани тиббиёт бирлашмасида ходимлар бўлими инспектори вазифасида фаолият юритиб келган фуқаро Содиқов фуқаро Акрамовани туман тиббиёт бирлашмасига ишга жойлаштириб қўйишни ваъда қилган.
Содиқов шу мақсадда фуқародан 2020 йилнинг 25 ноябрь куни 200 АҚШ долларини пора тариқасида олаётганда Давлат хавфсизлик хизмати Сирдарё вилояти бўйича бошқармаси ҳамда Бош прокуратура ҳузуридаги иқтисодий жиноятларга қарши курашиш департаментининг вилоят бошқармаси ходимлари томонидан жиноят устида қўлга олинган.
Шу билан бирга, Сирдарё тумани тиббиёт бирлашмасида ходимлар бўлими инспектори Нуриддин Ҳайдаров ҳам худди шундай жиноятга қўл урган.
Маълум қилинишича, у фуқаро Бердиевни Сирдарё тумани тиббиёт бирлашмасига ишга жойлаштириб қўйишни ваъда қилиб бунинг эвазига ундан 200 АҚШ доллари миқдорида пора олаётган вақтида жиноят устида қўлга олинган.
Уларга нисбатан Жиноят кодексининг тегишли моддалари билан жиноят иши очилган.
Аввалроқ Самарқандда аҳоли бандлигига кўмаклашиш маркази директори сохта ҳужжат тайёрлаб, 224 млн сўмни ўзлаштиргани маълум бўлгани, Фарғонада ЙҲХБ инспекторига 250 доллар пора бераётган фуқаро қўлга олингани ҳамда Тошкентда қўриқлаш хизматига ишга киритиб қўйиш учун 2 минг доллар пора олган шахсга жиноят иши очилгани ҳақида хабар берилганди.
Изоҳ (0)