АҚШда Pfizer вакцинаси билан эмланган икки тиббиёт ходимининг аҳволи ёмонлашди

АҚШнинг Аляска штати Жуно шаҳридаги Бартлетт минтақавий касалхонасида Pfizer ва BioNTech компанияларининг коронавирусга қарши вакцинаси билан эмланган икки нафар тиббиёт ходимининг мазаси қочди. Бу ҳақда Meduza хабар бермоқда.

15 декабрь куни эмлашдан кейин 10 дақиқа ўтиб, ўрта ёшли аёлда анафилактик реакция бошланган: нафаси қисиб, тошма тошган ва пулс тезлашган. Аёлга осма укол қўйишган, аммо уни олиб ташлагандан кейин симптомлар такрорланган. Жабрланувчи реанимацияга жойлаштирилган. Унинг аҳволи яхшиланган, уни 17 декабрь куни касалхонадан чиқариш режалаштирилган.

Яна бир тиббиёт ходими 16 декабрь куни вакцина олганидан кейин 10 дақиқа ўтар-ўтмас ёмон аҳволга тушган. Унда кўз шишиши, бош айланиши, томоқ қичиши каби симптомлар кузатилган. Уни тез ёрдам бўлимига етказишган. Бир соат ўтиб, эркакнинг аҳволи яхшиланган ва уйига жавоб берилган.

Касалхона маълум қилишича, жабрланган аёлда аллергик реакциялар олдин кузатилмаган. Жабрланган эркакда бундай ҳолат илгари бўлган-бўлмаганлиги номаълум.

16 декабрь ҳолатига кўра, Бартлетт минтақавий касалхонаси 144 доза вакцинани ишлатган. Аляска штати бош шифокори Энн Зинк маълум қилишича, касалхонадаги бундай ҳодисалар эмлаш графиги ва протоколларига таъсир ўтказмайди.

Pfizer компаниясининг расмий вакили Жерика Питтс айтишича, вакцина камдан-кам ҳолларда эмлашдан кейин анафилактик реакция кузатилиши эҳтимоли ҳақидаги огоҳлантириш билан бирга етказилмоқда.

Эслатиб ўтамиз, АҚШда 14 декабрь куни коронавирусга қарши эмлаш бошланди. Биринчи навбатда касалланганлар билан ишлаётган тиббиёт ходимлари эмланмоқда. Касалликлар назорати ва профилактикаси марказлари (CDC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда.

2 декабрь куни Буюк Британия дунёда биринчи бўлиб Pfizer’нинг коронавирусга қарши вакцинасидан фойдаланишни маъқуллаган эди. Шундан кейин Британия дунёда биринчи бўлиб коронавирусга қарши вакцинацияни бошлаши хабар берилди. Вакцинациянинг биринчи кунида илгари аллергияси бўлган икки тиббиёт ходимида анафилактик реакция кузатилгач, ҳукумат олдиндан жиддий аллергияси бўлганларни Pfizer ва BioNTech вакцинаси билан эмлашни тақиқлаб қўйди.

4 декабрь куни эса Баҳрайн ҳам Pfizer вакцинасидан фойдаланишни маъқуллади. Шунингдек, Pfizer ва BioNTech вакцинаси АҚШда ҳамда Мексикада ҳам маъқулланди.