Хитойнинг «Чанъэ-5» аппарати 44 йил ичида биринчи марта Ой тупроғи намуналарини Ерга етказди

Хитойнинг «Чанъэ-5» автоматик станцияси Ой юзасидан йиғиб олинган тупроқ намуналари солинган капсулани Ерга юборди, деб ёзади Meduza.

Мутахассислар 300 килограммли капсулани Ички Мўғулистон мухтор тумани ҳудудидан топган. Капсула келиб тушган жойга Хитой байроғи ўрнатилган.

Chang'e-5 Moon Mission Update: China's national flag is unfurled at the site of the Chang'e-5 returner which touched down in China's Inner Mongolian region. The lunar collection capsule is carrying what is believed to be the first lunar samples collected since 1976. pic.twitter.com/Lo5kIaS6dL

— CGTN (@CGTNOfficial) December 16, 2020

Хитой раиси Си Цзиньпин барча иштирокчиларни миссия якунлангани билан қутлади.

«Модулнинг Ерга қайтиши учта босқич: Ойни айланиб чиқиш, Ойга қўниш ва Ой тупроғи намуналарини Ерга етказишдан иборат Ойни тадқиқ қилиш режаси муваффақиятли равишда тугалланганини билдиради. Дастур 2004 йилда бошланган эди», — дейилади Sinxua агентлиги хабарида.

Хитой «Чанъэ-5» автоматик станциясини Ой юзасидан тупроқ йиғиб, Ерга юбориши учун ноябрь ойида Ойга учирган эди. 1 декабрь куни аппарат Ой юзасига муваффақиятли қўниб, шундан сўнг тупроқ намуналарини йиғишни бошлаган эди. Шунингдек, «Чанъэ-5» Ой юзасига Хитой байроғини ўрнатганди.

Ой тупроғини Ерга Хитойдан аввал фақат иккита мамлакат — АҚШ ва Собиқ иттифоқ етказиб келтирган эди. Ой тупроғини етказиш бўйича охирги миссия 1976 йилда амалга оширилган.

2019 йилнинг апрелида Хитой бошқа кўплаб мамлакатлар қатори, Ойга ўз одамини қўндириш имкониятини кўриб чиқаётгани маълум бўлганди. Май ойида эса «Юйту-2» луноходи Ойнинг орқа томонида Ой мантиясининг икки хил жинсларини топган эди.