Молдова парламенти пенсия ислоҳотини бекор қилди ҳамда эркаклар ва аёллар учун пенсияга чиқишнинг аввалги ёшини қайтарди. Бу ҳақда Meduza хабар берди.
Парламентнинг 101 депутатидан 54 нафари пенсия ёшини босқичма-босқич эркаклар учун 62 дан 63 га ва аёллар учун 57 дан 63 га кўтариш ҳақидаги қонунни бекор қилиш ташаббусини қўллаб-қувватлади. Қонун 2016 йилда қабул қилинганди.
Шу тариқа, 2021 йилнинг 1 январидан Молдовада эркаклар 62 ёшдан, аёллар эса 57 ёшдан пенсияга чиқиши мумкин. Бундан ташқари, янги қонунда беш нафар фарзанди бор оналар 54 ёшдан пенсияга чиқиши мумкинлиги белгилаб қўйилди.
Ноябрь ойида президентлик сайловида мағлубиятга учраган Молдованинг амалдаги президенти Игор Додон президент сифатида имзо чекишни истаётган сўнгги ҳужжати пенсия ёшини пасайтириш тўғрисидаги қонун эканлигини айтган.
Қайд этилишича, пенсия ислоҳотининг тасдиқланиши Халқаро валюта жамғармасининг Молдова билан янги дастур имзолаши учун асосий шартлардан бири бўлган. Пенсия ислоҳотининг бекор қилиниши Молдованинг ташқи молиялаштирилиши тўхтатилишига олиб келиши мумкин. Қонун парламент томонидан ҳукуматнинг хулосасисиз қабул қилинган. Бу эса бюджетдан молиялаштиришга тааллуқли қонунлар қабул қилинганда Конституцияга тўғри келмайдиган ҳолат ҳисобланади.
Эслатиб ўтамиз, Молдовада ўтказилган президентлик сайловларининг иккинчи турида 97,29 фоиз бюллетенлар ҳисоби бўйича 54,04 фоиз овоз билан мамлакат собиқ бош вазири ва «Ҳаракат ва бирдамлик» мухолифат партияси етакчиси Майя Санду ғолибликни қўлга киритди.
Изоҳ (0)