Наманганда бир кунда 12 та IT-School ўқув мактаби очилди

Наманган вилоятида бир кунда 12 та IT-School ўқув мактаби очилди. Бу ҳақда «Дарё» мухбири Азизбек Абдувалиев хабар бермоқда.

«Бир миллион дастурчи» лойиҳаси ижроси доирасида барча шаҳар-туманлардаги 12 та касб-ҳунар коллежи биносида ташкил мактаблар мебеллар тўплами, компьютер ва оргтехника қурилмалари билан жиҳозланди.

Ушбу марказларни «Наманган тажрибаси» сифатида республика IT-Park (Рақамли технологиялар ўқув маркази) билан бирлаштириш юзасидан вилоят ҳокимлиги ҳамда Ахборот технологиялари ва коммуникацияларни ривожлантириш вазирлиги ўртасида қўшма қарор қабул қилинганди. Мазкур келишувга асосан марказлар республика бошқарувига ўтказилиб, IT-Park вилоятдаги ҳар бир ўқув марказига 5-6 нафардан, жами 72 нафар мураббийни ишга олишни бошлади. Ўқитиш Ҳиндистон билан ҳамкорликда ишлаб чиқилган услубда ташкил этилади.

Ўқув марказларида йилига 10 минг нафардан ортиқ ёшлар ўқитилиб, уларга тегишли сертификат тақдим қилинади. Курсларни муваффақиятли якунлаган тингловчилар IT-Park Наманган филиалига фрилансер ва резидент сифатида қабул қилинади.

Наманган шаҳридаги IT-School ўқув марказида ўтказилган тақдимот маросимида вилоят ҳокими Шавкатжон Абдураззақов, Ахборот технологиялари ва коммуникацияларини ривожлантириш вазирининг ўринбосари Жамшид Эгамбердиев, Республика IT-Park маркази директори Фарҳод Ибрагимов ахборот технологиялари йўналишига қизиқувчи ёшлар билан мулоқотда бўлди, уларни қизиқтирган саволларга жавоб бердилар. Ушбу мулоқотга барча шаҳар-туманлардаги IT-School ўқув марказлари видео-алоқа орқали уланди.

— Кейинги йилларда дунё миқёсида «рақамли шаҳар» коцепсияси оммалашмоқда. Шу тажрибадан келиб чиққан ҳолда «Рақамли Наманган» тизимини жорий этишга киришганмиз. Намангандаги ахборот технологиялари мактабларини тамомлаган ёшлар бу жараёнда фаол иштирок этади деган умиддаман, — деди Шавкатжон Абдураззақов.

Маълумот учун, ўқув марказларидаги машғулотлар давомида маълумотларни таҳлил қилиш, андроид иловалар, веб-иловалар ва дастурий таъминот ишлаб чиқиш бўйича билим берилади. Бошланғич ўқув курслари бепул, дастурлаш ва графикани чуқур ўргатувчи курслар эса тўлов асосида фаолият олиб боради.