Ўзбекистонда Аи-80 маркали автомобиль бензинининг ўртача бошланғич нархи 2,6 фоизга кўтарилди, деб хабар беради «Халқ сўзи Онлайн».
Ўтган ҳафтада «Ўзбекистон республика товар хом ашё биржаси» АЖ савдоларига 20 556 тонна Аи-80 маркали автомобиль бензини қўйилди ва улардан 18 612,8 тоннаси, яъни 90,5 фоизи сотилган. Ўтказилган савдоларда ҳар куни ўртача 49 харидор иштирок этган.
«Кўриб чиқилаётган даврда сотувчи корхоналар Аи-80 маркали автомобиль бензинининг ўртача бошланғич нархларини маҳсулотнинг бир тоннаси учун 5700,5 минг сўмдан 5852,7 минг сўмгача ёки 2,7 фоизга кўтарди. Шу муносабат билан, Аи-80 маркали автомобиль бензинининг ўртача кунлик нархи ҳам маҳсулотнинг бир тоннаси учун 5725,5 минг сўмдан 5876,0 минг сўмгача ёки 2,6 фоизга ўсди», — дейилади хабарда.
Кўриб чиқилаётган даврда Аи-80 русумли автомобиль бензинининг ўртача ҳафталик котировкаси 5761,8 минг сўмни, Аи-91 эса 6652,4 минг сўмни ташкил этган.
Мавзуга доир:
Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан, ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг, 1 майдан дизель ёқилғиси нархи 500 сўмга пасайиб, 6500 сўм қилиб белгиланган. 3 майдан бошлаб эса Аи-80 бензинининг нархи 500 сўмга пасайиб, бир литри 4000 сўмдан сотила бошлаган.
Бундан ташқари, «Ўзбекнефтгаз» компаниясининг UNG бренди остидаги автомобилларга ёнилғи қуйиш шохобчаларида 13 апрелдан бошлаб Аи-91 маркасидаги бензиннинг бир литри нархи 5800 сўмдан 5600 сўмгача пасайтирилган. Шунингдек, дизель нархи 1 мартдан бошлаб 7500 сўмдан 7300 сўмга пасайтирилган, 3 апрелдан бошлаб эса дизель нархи яна 300 сўмга арзонлаштирилган ҳолда сотувга чиқарилганди.
Изоҳ (0)