Энергетика вазирлиги нима учун Ўзбекистондаги турли автомобилларга ёқилғи қуйиш шохобчаларида бензин бир нархда сотилмаётгани, импорт бензин маҳаллийдан кўра арзон эканлиги тўғрисидаги саволларга жавоб берди. Декабрь бошидан Аи-92 импорт бензин нархи алоҳида шохобчаларда маҳаллий Аи-80 билан тенглашган, яъни иккиси ҳам литри учун 5 минг сўмдан сотилмоқда.
Вазирлик хабарига кўра, бу бозорнинг либераллашувига ёрқин мисол бўла олади. Эслатиб ўтамиз, 2020 йилнинг баҳорида давлат Аи-80 бензини нархини тартибга солишни тўхтатган эди. Бундан олдинроқ Аи-90 бензини билан ҳам шундай бўлган. Шу сабабли бензин бозор рельсларига ўтиши билан арзонлашган.
2020 йилнинг 1 майидан бошлаб хўжалик юритувчи субъектлар, жумладан, АЁҚШлар бензинни биржа савдолари орқали сотиб олмоқда, бензин нархлари турли автомобилларга ёқилғи қуйиш шохобчаларида фарқ қилиши мумкин, чунки бу у ҳар бир АЁҚШ томонидан қанчага сотиб олинганига боғлиқ.
«Шу тариқа, бензин ва дизель ёқилғисини сотишнинг бозор механизми нефтни қайта ишлаш заводлари ва АЁҚШларга соғлом рақобат шароитида фаолият юритиш имконини беради. Таъкидланганидек, ҳозирги вақтда бензин нархининг ошиши ёки камайиши маълум бир талаб ва таклифга боғлиқ. Хусусан, бозор механизми жорий этилганидан сўнг, 3 майнинг ўзидаёқ «Ўзбекистон Республика товар-хом ашё биржаси» АЖда ўтказилган савдолар савдога қўйилган бензин нархи тушганини кўрсатган», — дейилади хабарда.
Таъкидланишича, биржа савдоларида «Ўзбекнефтгаз» АЖ нефть базалари, автомобилга ёқилғи қуйиш шохобчалари ва ўз эҳтиёжи учун бензин сотиб олувчи юридик шахслар иштирок этади. Савдолар эркин, шаффоф ва барча тоифадаги харид қилувчилар учун тенг шароитда ўтказилади.
Эслатиб ўтамиз, 2020 йил 1 майдан бошлаб Аи-80 маркали автомобиль бензини ва дизель ёқилғиси (шу жумладан, ЭКО маркали дизель ёқилғиси) чакана нархларини давлат томонидан тартибга солиш бекор қилинди. Шундан сўнг, 1 майдан дизель ёқилғиси нархи 500 сўмга пасайиб, 6500 сўм қилиб белгиланган. 3 майдан бошлаб эса Аи-80 бензинининг нархи 500 сўмга пасайиб, бир литри 4000 сўмдан сотила бошлаган.
Бундан ташқари, «Ўзбекнефтгаз» компаниясининг UNG бренди остидаги автомобилларга ёнилғи қуйиш шохобчаларида 13 апрелдан бошлаб Аи-91 маркасидаги бензиннинг бир литри нархи 5800 сўмдан 5600 сўмгача пасайтирилган. Шунингдек, дизель нархи 1 мартдан бошлаб 7500 сўмдан 7300 сўмга пасайтирилган, 3 апрелдан бошлаб эса дизель нархи яна 300 сўмга арзонлаштирилган ҳолда сотувга чиқарилганди.
Изоҳ (0)