«Ҳозирча фаолиятимдан қониқиш ҳосил қилмаяпман» — Муборак тумани ҳокими ҳокимлик машаққатлари ҳақида

Қашқадарё вилоятининг Муборак тумани ҳокими Улуғбек Эрназаров Халқ депутатлари туман кенгашининг навбатдаги сессиясидан сўнг журанлист ва блогерлар билан суҳбатлашиб, ҳокимлик фаолиятидаги машаққатлар ҳақида гапирди, дея хабар берди «Дарё» мухбири.

Ҳоким Улуғбек Эрназаров «Дарё» мухбирининг «Олти ойлик фаолиятингиз давомида режалаштирилган ишларингизнинг қай бирига улгурдингиз-у, қай бирига улгурмадингиз ва 2021 йилга қолди?», деган саволига жавоб берар экан, барча нарса ҳам ҳокимларга боғлиқ эмаслигини таъкидлади.

«Ҳоким бўлгунимча туманни жуда тез ривожлантириб, катта ўзгаришлар қилишни, фуқароларнинг ҳаётида жуда катта ўзгаришларни амалга ошириб, шу юртда ижобий номим қолишини орзу қилганман. Аммо ҳамма нарса ҳам биз ўйлагандек бўлавермайди. Ҳозир қанча кўп ишлаётган бўлсак ҳам, ишнинг охирига етиб бўлмаяпти. Сабаби кўп нарса ҳокимларга боғлиқ эмас экан. Айрим ишлар кўп вақт талаб қилади. Айрим ташкилотлар эса юртбошимиз талаб қилаётган ишларни бажаришга, улар айтган даражага етиб олишга салоҳияти етмаяпти. Бу эса ҳоким фаолиятига катта таъсир қилади. Шу боис, ҳозирча фаолиятимдан қониқиш ҳосил қилмаяпман. Мен ўйлаган натижа бўлмаяпти. Лекин ҳаракатдан тўхташ йўқ», — деди Улуғбек Эрназаров.

Ҳоким ҳисоб-китобига кўра, у фаолияти давомида амалга ошириши керак бўлган ишларнинг 7—8 фоизини бажаришга улгурган.

«Туманда муаммоларимиз ҳам, халқ талаби ҳам кўп. Халқимиз бир неча йиллардан бери амалга ошмаётган орзу-умидлари жуда тез, бугун амалга ошишини талаб қиляпти. Шунинг учун ҳам мен ўзим олти ойлик фаолиятимдан қониқиш ҳосил қилмаяпман. Режалаштирилган ишларимга улгурмаяпман. Аммо энди тажрибам ортмоқда, кўряпмиз ва ёнингизда кимлар бўлиши кераклигини биляпмиз. Боиси, кўп нарса ҳоким ёнидаги жамоага боғлиқ. Ҳоким жамоаси кучли бўлса, ходимлар туман юкини ҳоким билан баравар тортса, юк енгил бўлади. Ҳозир юк оғир. Жамоамиз янгиланяпти, ёшаряпти. Шунинг учун 2021 йилда натижамиз бундан ҳам яхши бўлади», — деди туман ҳокими.

Эслатиб ўтамиз, 2019 йилдан буён Қашқадарё вилояти Транспорт бошқармаси бошлиғи вазифасида ишлаган Улуғбек Эрназаров 2020 йил 19 май куни Муборак туманига ҳоким этиб тайинланган эди.