Фарғона вилоятининг Сўх туманида ўндан ортиқ фойдали қазилма конлари аниқланган. Бу конларни ўзлаштиришга маҳаллий тадбиркорлар ва хорижий инвесторларни жалб этиш режалаштирилган. Бироқ туманнинг анклав ҳудуд эканлиги айрим муаммоларга сабаб бўлмоқда.
Бу ҳақда Фарғона вилояти ҳокими Хайрулло Бозоров вилоятда 2020 йилда амалга оширилган ишлар якуни ва 2021 йилдаги ижтимоий-иқтисодий ривожлантириш масалалари бўйича халққа қилган мурожаатида маълум қилди, дея хабар берди «Дарё» мухбири.
«2020—2021 йилларда Сўх туманини комплекс ижтимоий-иқтисодий ривожлантириш чора-тадбирлари дастурининг ижросига алоҳида эътибор қаратилмоқда. Дастур асосида туманда жуда катта ишлар амалга оширилади. Сўх туманида ўндан ортиқ фойдали қазилмалар аниқланган. Энди уларни ўзлаштириш ва ишлаб чиқаришни йўлга қўйиш учун инвестиция масаласини ўйлаяпмиз. Ҳозирда бу бўйича ижтимоий тармоқларда, телеканалларда эълонлар берилган. Хорижий давлатлардаги сўхлик ватандошларимизни ҳам шу каби истиқболли лойиҳаларга таклиф этиш керак.
Насиб қилса, яқин вақтларда туманга йўл очиш масаласи ҳам ҳал бўлади. Вилоятимизга Қирғизистондан делегация келди. Улар билан йўл масаласида, яхши қўшничилик мавзуларида гаплашдик. Сўхга сармоя киритаман, деган инвесторлар бор, аммо туман анклав ҳудуд экани сал муаммо бўлиб турибди. Аслида бу ишларга Сўхнинг ўзидан тадбиркорларни жалб этсак, яхши бўларди. Биз бу тадбиркорларни ҳар томондан қўллаб-қувватлашга тайёрмиз», — деган вилоят ҳокими ўз мурожаатида.
Вилоят ҳокимининг таъкидлашича, Сўх туманида бугунги кунда қишлоқ хўжалигида фойдаланмайдиган ерларни ўзлаштириш, оборотдан чиқиб кетган ерлардан самарали фойдаланиш бўйича ҳам салмоқли ишлар амалга оширилган. Туманнинг тоғолди ва адир ҳудудларига сув чиқариш мақсадида Қайроқ–1 ва Қайроқ–2 насос станциялари барпо этилмоқда. Мазкур иккита насос станцияси ишга туширилгач, 1500 гектарга яқин ер ўзлаштирилади. Ўзлаштирилган ерлар сўхликларга мақсадли тарзда бўлиб берилади. Кооперация тузилиб, даромад келтирувчи ва фойдали маҳсулотлар етиштирилади.
Изоҳ (0)