Сирдарё вилояти Гулистон шаҳрида профилактика инспекторига фаол қаршилик кўрсатиб, унга тан жароҳати етказган шахслар қамоққа олинди. Бу ҳақда вилояти ИИБ ахборот хизмати хабар берди.
Маълумотларга кўра, 29 ноябрь куни тунги соат 01:00 ларда Гулистон шаҳар ИИО ФМБ 3-сонли ИИБ навбатчилик қисмига Гулистон шаҳар «Баҳор» маҳалласи Тошкент йўли кўчасида жойлашган «Safina» номли кафеда жанжал бўлаётганлиги ҳақида хабар келиб тушган.
Унга асосан, воқеа жойига етиб борган ушбу маҳалла профилактика инспектори Гулистон шаҳар ИИО ФМБда, маъмурий назоратда турувчи, «Safina» кафесининг иш юритувчиси бўлиб ишловчи фуқаро Д.С. ҳамда уч нафар нотаниш шахс биргаликда спиртли ичимлик истеъмол қилиб ўтирганлигини кўрган. Д.С.нинг маъмурий назорат қоидаларини бузиб, спиртли ичимлик истеъмол қилиб ўтирганлиги сабабли улар ўтирган жойни ўзининг телефон аппаратида фотосуратга олиб, ҳолат юзасидан тегишли ҳужжатлар расмийлаштириш учун уларни 3-сонли ИИБга боришни таклиф қилган.
Шу вақтда унинг олдига маст ҳолатда бўлган фуқаро К.Л. ҳамда маъмурий назорат остида бўлган Д.С. келиб, биргаликда ходимга нисбатан қўпол муносабатда бўлган ва иккаласи бирга профилактика инспекторининг бош, юз қисми ва баданининг турли жойларига уриб-тепиб, тан жароҳати етказган. Шунингдек, инспекторнинг телефон аппаратини олиб, ерга уриб синдириб, яроқсиз ҳолатга келтирган.
Мазкур ҳолат юзасидан Гулистон шаҳар прокуратураси томонидан фуқаролар К.Л. ва Д.С.га нисбатан Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми билан жиноят иши қўзғатилиб, эҳтиёт чораси сифатида Жиноят-процессуал кодексининг 221-моддаси тартибида қамоққа олинган.
Ҳозирда ҳолат юзасидан тергов ҳаракатлари олиб борилмоқда.
Аввалроқ Тошкентда ЙПХ ходимини калтаклаган икки судья лавозимидан олингани, уларнинг шеригига ҳайфсан берилгани, Самарқандда хизмат ўтаётган 31 ёшли ИИБ профилактика инспектори Damas уриб кетиши оқибатида вафот этгани ҳамда Оққўрғонда ЙПХ ходимининг погонини ва камерасини юлиб олган 3 йўловчи 15 суткага қамалгани ҳақида хабар берилганди.
Изоҳ (0)