Ўзбекистон Жиноят кодексидан туҳмат ва ҳақорат қилганлик учун озодликдан маҳрум қилиш жазоси олиб ташланиши кутилмоқда

Қонунчалик палатаси мажлисида Жиноят кодекси ва Маъмурий жавобгарлик тўғрисидаги кодексларга ўзгартириш ва қўшимчалар киритиш бўйича қонун лойиҳаси кўриб чиқилади, дея хабар қилмоқда депутат Расул Кушербаев ўз Telegram каналида.

Қонун лойиҳасига кўра, Жиноят кодексидан туҳмат ва ҳақорат қилганлик учун мавжуд бўлган озодликдан маҳрум қилиш жазоси бекор қилиниб, ўрнига жарима ёки мажбурий жамоат иши жазоси қўшилмоқда.

Шунингдек, қонун лойиҳаси билан Маъмурий жавобгарлик тўғрисидаги кодексга ва Жиноят кодексига ёлғон ахборот тарқатганлик учун жавобгарлик белгиланмоқда. Порнографик маҳсулотларни тарқатиш ва шафқатсизликни тарғиб қилганлик учун ҳам жарима миқдорлари оширилмоқда.

Қайд этилишича, қонун лойиҳаси депутатлар ташаббуси билан киритилган. Қонун лойиҳаси Сенатга юборилган.

Аввалроқ Ўзбекистон Конституциясига қандай ўзгартиришлар киритилиши маълум бўлгани, Расул Кушербаев «снос»лар билан боғлиқ муаммоларни ечиш учун мораторий эълон қилишни таклиф этгани ҳамда Комил Алламжонов АОКА ва Адлия вазирлигини ОАВ вакиллари ҳуқуқларини мустаҳкамлашга қаратилган таклифлар ишлаб чиқишга чақиргани ҳақида хабар берилганди.