АҚШда COVID-19 коронавирус инфекциясига қарши вакцина билан биринчи навбатда эмланадиганлар гуруҳига юқори даражали мансабдорлар, шу жумладан, Оқ уйнинг баъзи вакиллари ҳам киради. Бу ҳақда Оқ уй қошидаги Миллий хавфсизлик кенгаши матбуот хизматига таяниб, «РБК» хабар бермоқда.
«Ҳокимиятнинг барча учта тармоғидаги юқори мансабли амалдорлар ижро ҳокимияти томонидан белгиланган протоколларга мувофиқ эмланади», — деди матбуот хизмати вакили Жон Эллиот.
Оқ уйда COVID-19 билан октябрда касалланиб ўтган АҚШ президенти Дональд Трамп вакцина олиш-олмаслигига аниқлик киритишмади. Аммо Bloomberg ўз манбасига таяниб ёзишича, давлат раҳбарига бирламчи тартибда эмланиш таклиф этилади.
Кейинроқ Дональд Трамп ўз Twitter’ида ҳозирча COVID-19’га қарши вакцина олишни режалаштирмаётганини маълум қилди.
«Оқ уйда ишлайдиган одамлар вакцинация дастури доирасида сал кейинроқ эмланиши керак, агар бунга алоҳида эҳтиёж бўлмаса. Мен шундай тузатиш киритишни сўрадим», — деб ёзди Америка етакчиси.
Трамп аниқлик киритишича, унинг ўзи ҳозирча вакцина олмайди, аммо вақти келганида эмланиш имкониятини «интиқлик билан кутади».
Бу ахборотни Reuters манбаси тасдиқлади, унга кўра, америкалик бошқа юқори даражали мансабдорлар, шу жумладан, вице-президент Майкл Пенсда 14 декабрь, душанба куниёқ вакцина олиш имконияти бўлади. Амалдаги президентнинг рақиби демократ Жозеф Байден ва унинг жамоаси аъзоларига бундай таклиф берилиши эса номаълум.
Америка раҳбарияти ўн кун давомида эмланади, бу мансабдорлар иккиламчи таъсирларни бир вақтнинг ўзида бошдан ўтказмаслиги учун қилинади.
Эслатиб ўтамиз, Американинг Pfizer ва Германиянинг BioNTech компаниялари томонидан ҳамкорликда ишлаб чиқарилган вакцинанинг илк партиялари АҚШ вакцинация марказларига 14 декабрь, душанба куни етказиб берилишни бошлайди.
12 декабрь куни АҚШ Озиқ-овқат маҳсулотлари ва дори воситаларини назорат қилиш бошқармаси (FDA) Pfizer ва BioNTech компаниялари томонидан яратилган коронавирусга қарши вакциналардан фойдаланишга рухсат берди.
АҚШ президенти Дональд Трампнинг маълум қилишича, вакцинанинг биринчи дозасини юбориш ишлари «24 соатдан камроқ вақт ичида» амалга оширилади.
Американинг Pfizer фармацевтик гиганти билан бирга COVID-19’га қарши вакцина яратган Германиянинг BioNTech биоинжиниринг компанияси раҳбари Угур Шаҳин АҚШда вакцинация жараёни нормал кечган ҳолда, 2021 йил ёзи охирига келиб, коронавирус инфекцияси пандемиясини назорат остига олишга муваффақ бўлиш мумкинлиги ҳақида айтиб ўтди.
Сўнгги маълумотларга кўра, АҚШда пандемия бошидан буён 16 020 646 киши коронавирусга чалинган, 297 575 киши касалликдан вафот этган.
Изоҳ (0)