Қирғизистонда 18 киши президентликка номзод сифатида рўйхатга олинди

Қирғизистонда сайловлар ва референдумлар ўтказиш бўйича Марказий сайлов комиссияси (МСК) 18 кишини республика президенти лавозимига номзод сифатида рўйхатга олди, деб хабар бермоқда «ТАСС» МСК матбуот хизматига таяниб.

Номзодлар рўйхатида «Бутун Қирғизистон» партияси етакчиси Адахан Мадумаров, собиқ мамлакат президенти вазифасини бажарувчи Садир Жапаров, Миллий хавфсизлик давлат қўмитаси собиқ раҳбари Абдил Сегизбаев, парламент депутати Канибек Иманалиев ҳам бор. Қирғизистонда муддатидан аввалги президент сайловлари 2021 йил 10 январга белгиланган.

Дастлаб ўз номзодини қўйиши ҳақида МСКга 63 киши мурожаат қилган, аммо улардан 20 нафаригина 30 минг сайловчидан имзо йиғишга ва 1 миллион сом (12,5 минг доллар) гаров пули беришга муваффақ бўлган. Икки нафар номзод тўплаган имзолар эса МСК томонидан ҳақиқий эмас деб топилди.

Президентликка номзодлар 15 декабрдан ташвиқот ишларини бошлайди.

Эслатиб ўтамиз, Қирғизистонда 4 октябрь куни парламент сайлови бўлиб ўтди. Марказий сайлов комиссиясининг дастлабки маълумотларига кўра, парламентда депутатлик ўрнига эга бўлиш учун зарур бўлган етти фоизлик довондан тўртта партия ўта олди.

Сайлов натижаларидан норози бўлган минглаб кишилар 5 октябрь куни намойишга чиқди. Намойишлар тартибсизликка айланиб кетди, тартибсизликларда бир неча юз киши жароҳат олди, бир киши вафот этди. Намойишчилар мамлакат парламенти ва президент администрацияси жойлашган бинони эгаллаб олди, шунингдек, мамлакатнинг собиқ президенти Алмазбек Атамбаев ва собиқ бош вазир Сапар Исаковни қамоқдан озод қилди. Қирғизистон Марказий сайлов комиссияси 6 октябрь куни парламент сайлови натижаларини ҳақиқий эмас деб топди.

15 октябрь куни Сўронбай Жээнбеков Қирғизистон президентлиги лавозимидан истеъфо берганини эълон қилди. У бош вазир Садир Жапаров ва бошқа сиёсатчилардан ўз тарафдорларини пойтахтдан олиб чиқиб кетишни сўраган ва улардан бишкекликлар тинчлигини бузмасликни илтимос қилган. 16 октябрь куни парламент мажлисида Қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этган. Якунда бош вазир Садир Жапаров президент вазифасини бажарувчига айланди.

У мамлакат раҳбари вазифасини бажарувчи ваколатларини 15 ноябрь куни топширди. Қирғизистонда муддатидан олдинги президентлик сайловлари 2021 йилнинг 10 январида бўлиб ўтади.