Бухоро вилоятининг Қоровулбозор туманида поезд ва Nexia автомобилининг тўқнашуви оқибатида икки фуқаро вафот этган. Бу ҳақда «Дарё»га вилоят ИИБ ЙҲХБ ахборот хизмати раҳбари Улуғбек Шукруллаев хабар берди.
Таъкидланишича, автоҳалокат Қоровулбозор туманидаги Бухоро нефтни қайта ишлаш заводи тасарруфидаги ички хўжалик автомобиль йўлининг Қоровулбозор разъезди 144-сонли бекатлар оралиғи 4000-километридаги темир йўлнинг қўриқланмайдиган кесишмасида содир бўлган.
Корхона томон йўлга чиққан оқ рангли Nexia ҳайдовчиси Р.Ж. яқинлашиб келаётган поездни кўрса-да, темир йўл кесишмасидан тезроқ ўтиб кетишни кўзлаган ва темир йўлнинг қатнов қисмига чиқиб кетган. Натижада тепловознинг олд қисми Nexia’нинг чап томонига урилган. Оқибатда автомашина ҳайдовчиси Р.Ж. ҳамда олд ўриндиқда ўтирган йўловчи Ш.Н. оғир тан жароҳати олиб, воқеа жойида вафот этган.
Мазкур ҳодиса вилоят ИИБ ЙҲХБ бошлиғи, вилоят ИИБ тергов бошқармаси, тергов-тезкор гуруҳи ходимлари ҳамда тегишли мутасадди ташкилотлар вакиллари иштирокида ўрганилган. Ўрганувга кўра, ҳодиса жойида йўл ётиқ чизиқлари мавжудлиги, тўхтов белгиси тўлиқ ўрнатилгани, бир изли темир йўл кесишмаси, 1/3-1 йўл белгиси мавжудлиги ҳамда темир йўл устки қисмлари соз ҳолатдалиги аниқланган.
«Ушбу ҳодиса содир бўлган темир йўл кесишмасига олиб борувчи ички хўжалик йўли Бухоро нефтни қайта ишлаш заводи томонидан қўриқланадиган ҳудуд саналади. Шу боис, бу ерда ҳар бир транспорт воситаси ҳамда фуқароларнинг кириб-чиқиши учун блокпост ташкил этилган. Ушбу ҳудудга фақат мазкур корхонада ишловчи ходимларга тегишли бўлган транспорт воситалари махсус рухсатнома асосида кириб-чиқиши мумкин. Ўрнатилган видеокамералар кузатилганда, бахтсиз ҳодиса ҳам айнан шу корхона ишчилари билан содир бўлгани аниқланди», — деди Улуғбек Шукруллаев.
Маълум қилинишича, Вазирлар Маҳкамасининг 2011 йил 15 ноябрдаги қарорига мувофиқ, атрофи ўралган ҳудудлар, қўриқланадиган ва кириш рухсатнома орқали амалга ошириладиган ташкилотларнинг ичкарисида содир бўладиган ҳолатлар йўл транспорт ҳодисаси сифатида статистика ҳисобига олинмаслиги кўрсатиб ўтилган.
Эслатиб ўтамиз, аввалроқ Сурхондарё вилояти Музрабод туманида тепловоз темир йўл кесишмасига чиқиб қолган Matiz автомобилини уриб юбориши оқибатида ҳайдовчи ҳалок бўлгани хабар берилганди.
Изоҳ (0)