Навоий вилоятида 2021 йилнинг 1 январидан ичимлик суви ва канализация хизмати нархи қарийб 3 баравар ошади. Халқ депутатлари Навоий вилояти кенгашининг 1 декабрь куни бўлиб ўтган XII сессиясида ушбу таклиф маъқулланган.
Янги тарифга кўра, 2021 йилдан бошлаб 1 кубометр ичимлик суви аҳоли учун 3000 сўм (ҳозир 1080 сўм), бюджет ташкилотлари ва улгуржи истеъмолчилар учун 7500 сўм (3300 сўм), канализация хизматлари учун 1 кубометр сув нархи аҳолига 2700 сўм (1000 сўм), бюджет ва улгуржи истеъмолчиларга 7000 сўм (2800 сўм) этиб белгиланди.
«Навоий сув таъминоти» компанияси матбуот хизматининг маълум қилишича, Навоий вилояти аҳолисининг 64 фоизи (647 минг нафардан ортиғи) марказлашган ичимлик суви билан таъминланган.
Шундан қишлоқ жойларида яшовчи 354,9 минг аҳолига «Навоий сув таъминоти» МЧЖ, Навоий шаҳри маркази, Зарафшон, Учқудуқ шаҳарлари ҳамда Конимех туманининг Зафаробод қўрғонига алоҳида тарифлар асосида вилоят «Иссиқлик манбайи» ДУК хизмат кўрсатиб келади.
Шундан 354,9 минг қишлоқ ҳудудларидаги аҳолига, жумладан, Навоий шаҳрининг чекка ҳудудлари, Кармана, Конимех, Қизилтепа, Навбаҳор, Хатирчи, Нурота ва Томди туманларидаги истеъмолчиларга «Навоий сув таъминоти» МЧЖ томонидан хизмат кўрсатилади.
Вилоятнинг Навоий шаҳар маркази, Зарафшон, Учқудуқ шаҳарлари ҳамда Конимех туманининг Зафаробод қўрғонига алоҳида тарифлар асосида вилоят «Иссиқлик манбайи» давлат унитар корхонаси томонидан хизмат кўрсатиб келинмоқда.
Қайд этилишича, бугунги кунда «Навоий сув таъминоти» МЧЖ балансидаги мавжуд 199 та сув тарқатиш иншоотининг 28 таси (14 фоизи) жиддий таъмирланишга зарурат сезмоқда. Вилоят бўйича жами 2784,8 километр ичимлик суви тармоқлари мавжуд бўлиб, улардан 463,4 километри (17 фоиз) таъмирлашга муҳтож бўлиб қолган.
Шу билан бирга, сув тарқатиш иншоотларининг тармоқлари ва ускуналарининг муҳим қисми 50 йилдан кўпроқ вақт олдин ётқизилган бўлиб, маънан эскирган. Оқибатда аҳолига етказиб берилаётган ичимлик сувида йўқотишлар ошиб, тизимда оғир иқтисодий аҳвол юзага келган», — дейилади хабарда.
Шу билан бирга, инвестиция дастури асосида 2020 йилнинг ўзида 42 миллиард сўмлик 15 та янги лойиҳа амалга оширилгани, инфратузилма эскирганлиги сабабли улардан самарали фойдаланиш имкониятлари ҳам етарли даражада эмаслиги таъкидланган.
«Ушбу муаммолар тизимда энергия истеъмолининг юқори даражадалиги, маънан эскирган тармоқларнинг ўз вақтида модернизация қилинмаганлиги, моддий рағбатлантириш даражаси пастлиги сабаб соҳада малакали мутахассислар ва ишчилар етишмаслиги, ахборот-коммуникация технологиялари изчил жорий қилинмаганлиги, моддий техника базаси ривожланмаганлиги туфайли келиб чиқмоқда.
Яна бир муҳим жиҳат — вилоятда Осиё тараққиёт банки кредит маблағлари ҳисобидан жами 25,7 миллион долларлик ичимлик суви таъминоти тизимини такомиллаштиришга йўналтирилган 2 та лойиҳа амалга оширилган бўлиб, ушбу жалб қилинган маблағларни қайтариб бориш ҳам янги тарифларда инобатга олинмоқда», дея тушунтирган «Навоий сув таъминоти» матбуот хизмати.
Билдирилишича, 2021 йилда ажратилиши режалаштирилган жами 26,8 миллиард сўмлик бюджет маблағлари ҳисобидан:
- Навоий шаҳри ва ЭИЗ ҳудудида янги сув тармоқлари тортилади;
- Ғозғон шаҳрида канализация хизматлари ташкил қилинади;
- Хатирчи туманида янги канализация тармоқлари тортилади.
Жамият таклиф этилган тариф ҳисобига вилоятда яқин йиллар ичида қуйидаги ишларни амалга оширишни режалаштирмоқда:
- 28 та объект ҳамда маънан эскирган 463,4 километр қувурларни модернизация қилиш;
- кўча колонкадан фойдаланувчи 21 мингта истеъмолчининг хонадонигача сув тармоғи ўтказилиб, сув ўлчагич ўрнатиб берилиши;
- олис ҳудудлардаги ичимлик суви билан таъминланмай қолган 25 мингга яқин аҳолига марказлашган ҳолда ичимлик сувини етказиб бериш;
- халқаро молиявий институтлар олдидаги қарз мажбуриятларини бажариш;
- 40 мингдан зиёд истеъмолчининг сув таъминотидаги узилишларини бартараф этиш;
- тармоқда сув йўқотишларнинг олдини олиш;
- соҳага малакали мутахассисларни жалб этиш;
- моддий техника базани янгилаш орқали аҳолига сифатли хизмат кўрсатиш.
«Навоий сув таъминоти»нинг қайд этишича, ичимлик суви тарифларни белгилашда ҳудудларнинг географик жойлашуви, сув манбаларидан аҳоли пунктларигача бўлган масофалар, ичимлик суви ишлаб чиқаришга сарфланган харажатлар эътиборга олинади. Шу сабабли, ичимлик суви ва канализация хизматлари кўрсатиш тарифлари ҳар бир вилоят учун алоҳида шаклда белгиланади.
«Агар рақамларга эътибор қаратсак, ‘Навоий сув таъминоти’ масъулияти чекланган жамияти истеъмолчиларга сув таъминотининг 70 фоиздан ортиғини ‘Дамҳўжа сув таъминоти’ МЧЖнинг Самарқанд вилоятидаги сув иншооти қувурлари орқали етказиб бермоқда», — дейилади хабарда.
«Навоий сув таъминоти» масъулияти чекланган жамиятига тегишли тармоқнинг асосий қисмларида сувни етказиб бериш учун икки ёки ундан кўп кўтаргичдан фойдаланилади. Бу ҳолатда табиий равишда электр энергия сарфи камида 2 бараварга ошишига олиб келади.
Изоҳ (0)