Уй, оила, машиналар ва хайриялар. Футбол даҳоси Зинедин Зиданнинг ҳашаматли ҳаёти

Футболчилик фаолиятидан сўнг узоқ йиллар давомида «Реал Мадрид» мураббийлар штаби ва клуб тизимида тажриба орттирган Зинедин Зидан қандайдир бир икки йил ичида топ-даражадаги мураббийга айланди ва ҳеч бир мутахассисга насиб этмаган натижаларга эриша олди. Мухлисларни эса даҳонинг натижаларидан ташқари қандай ҳаёт кечириши ҳам қизиқтиради. Қуйида Зиданинг ҳашаматли ҳаёти ҳақида ҳикоя қиламиз.

Қаерда яшайди?

Зиданнинг уйи Мадриднинг обрўли туманларидан бири бўлган Пиоверада жойлашган, «Сантьяго Бернабеу» ва уйнинг орасидаги масофа 5–6 километрни ташкил қилади. Уйнинг фотосуратлари жуда ҳам кўп эмас, лекин ундаги улкан ҳовуз дарҳол диққатни тортади.

Шунинг билан бирга унинг ҳашаматли эканига ҳам ҳеч қандай шубҳа йўқ. Эътиборга молик жиҳати, Зизу икки бор ўғрилик қурбонига айланган бўлишига қарамай у ердан кўчиш ҳақида ўйламаган.

Машиналари

«Қироллик клуби» бош мураббийининг гаражига ҳам ҳавас қилса арзийди — унинг автопаркидан Bentley Mulsanne (300 минг доллар), Range Rover Vogue (200 минг доллар), Audi RS6 (200 минг доллар) ва Audi ТТ (тахминан, 30 минг доллар атрофида) каби қимматбаҳо машиналар ўрин олган.

Оиласи

Зидан тўрт ўғлининг онаси Вероника билан 1994 йилда турмуш қурган. Фарзандларнинг барчаси отаси изидан кетиб, миллионлар ўйини соҳасини танлаган. Бироқ ҳали улар ёш ва айтарли катта ютуқларга эришмаган. Зидан эса ҳар доим ўзининг оилапарварлиги билан барчага намуна бўлиб келган.

Дўстлари ким?

Афсонавий французнинг дўстлари ҳақида гап кетганда Зизунинг 30 йиллик дўстини эсламаслик мумкин эмас — бу унинг «Реал»даги ёрдамчиси Давид Беттони. Улар «Кан» академиясида бирга таҳсил олган ва битта хонада яшаган. Ҳатто 1996 йилда Зидан «Ювентус» билан шартнома имзолаганида франциялик Турин клубидан дўстига ҳам Италиядан жамоа топиб беришни сўрайди. Айтишларича, Беттони ажойиб стратег бўлиб, айнан у Зиданга аниқ рақибга қарши маълум ўйин тактикасини танлашда ёрдам берар экан.

Шунингдек, Зидан собиқ жамоадоши бразилиялик Роналдо билан ҳам илиқ алоқаларга эга.

Футболдан ташқари қизиқишлар

Зизунинг ишдан ташқари, энг севимли машғулоти, бу хайриялар. Франциялик мутахассис мунтазам равишда касал болалар ва кам таъминланган оилаларнинг фарзандларини қўллаб-қувватлаб келади. Бундан ташқари у кўплаб юлдузлар билан биргаликда хайрия учрашувларини ташкил қилади ва уларда иштирок этади. Умуман олганда, Зидан ҳар томонлама ҳурматга сазовор инсон.

Даромади

Францияликнинг Мадрид клубидаги бир йиллик маоши, тахминан, 16 миллион еврога (бонуслардан ташқари) тенг. Таққослаш учун 2016 йилда (Зидан илк марта «Реал» бош мураббийи лавозимига тайинланганди) бу кўрсаткич 2,5 миллион еврога тенг эди. Шунингдек, Зидан омма эътиборини торта олгани учун уни тез-тез рекламаларга ҳам чақириб туришади. Унинг умумий бойлиги, тахминан, 115—120 миллион еврога баҳоланган.