Ижтимоий тармоқларда Қашқадарё вилоятининг Қамаши туманида яшовчи 30 ёшли фуқаро Яккабоғ туманида яшаб келаётган 25 ёшли ҳомиладор хотини, 55 ёшли қайнонаси ва хонадон эгаларининг 8 ва 6 ёшли набираларини ваҳшийларча ўлдирилгани ҳақида хабар берилди.
Бош прокуратуранинг маълумот беришича, воқеа 2020 йилнинг 9 декабрь куни соат 23:30 да содир бўлган.
«Дарё» мухбири Отабек Қўлдошев воқеа тафсилотларини ўрганиш мақсадида Яккабоғ туманининг «Эски Яккабоғ» маҳалласида бўлди.
«Эски Яккабоғ» МФЙ профилактика инспектори Хондамир Холматовнинг маълумот беришича, Қамаши туманининг Қизилтепа қишлоғида яшовчи 30 ёшли А.Б. 2020 йил 9 декабрь куни соат чамаси 23:00 да турмуш ўртоғи марҳума Маржона Маҳаммадиеванинг ота уйи Яккабоғ туманининг «Эски Яккабоғ» маҳалласи, Отчопар кўчасидаги хонадонга ҳовли девордан яширинча ошиб ўтиб, қайнонаси марҳума Назира Шернаева, ҳомиладор хотини Маржона Маҳаммадиева ҳамда қайнонасининг икки нафар набирасини пичоқлаб ўлдирган.
Маълум бўлишича, қотилликда гумонланаётган 30 ёшли А.Б. ва марҳума Маржона Маҳаммадиева 2019 йилнинг 22 декабрь куни турмуш қурган бўлиб, Қамаши туманининг «Бунёдкорлик» МФЙ Қизилтепа қишлоғида истиқомат қилиб келган. 2020 йилнинг июль ойига қадар бирга яшаган эр-хотин оилавий келишмовчилик сабаб сўнгги пайтларда алоҳида яшай бошлаган.
«Эски Яккабоғ» МФЙ раиси Муродилла Турдимовнинг айтишича, Маржона Маҳаммадиеванинг ота уйида яшаётганини кўргач, сабабини сўраган.
«Раҳматли Маржонадан нега турмуш ўртоғи билан бирга яшамаётганини сўраганимда, онаси Назира Шернаева қизи соғлиғи йўқлиги сабаб унга қараб турганини айтганди. Ва тез орада соғайсам, қизимни ўзим уйига олиб бориб қўяман деганди», — дейди МФЙ раиси.
Қотиллик ҳақида дастлабки хабарни тарқатган Тuron24/7 Telegram канали қотил ота ҳомиладор турмуш ўртоғи, икки нафар фарзанди ва қайнонасини ўлдирганини ёзганди. Бироқ МФЙ масъуллари ва марҳума Назира Шернаевнинг қариндошлари қотиллик қурбонига айланган 8 ва 6 ёшли болалар марҳума Назира Шернаева ўғлининг фарзандлари эканлигини айтмоқда.
«Норасида гўдаклар синглим ўғлининг фарзандлари — 8 ёшли қизи ва 6 ёшли ўғли эди. Болаларнинг ота-онаси уларни синглимга ташлаб, тирикчилик сабаб Россияга ишлашга кетганди. Бугун, 11 декабрь куни қайтиб келяпти. Куёвимиз ўша куни кечаси ҳовлидан ошиб кириб, Маржонани, синглим Назирани ва унинг саккиз, олти ёшли набираларини ваҳшийларча пичоқлаб ўлдирган. Уларни қийноққа солган. Кечаси бўлгани учун ҳеч ким эшитмаган», — дейди марҳума Назира Шернаеванинг акаси Абдусалим Эшмаматов.
Марҳуманинг қариндоши Шерзод Маҳаммадиевнинг маълумот беришича, келини Назира Шернаева куёви томонидан пичоқлангач, жон талвасасида 20-30 метр юрган ва бақириб одамларни ёрдамга чақирган.
«Кечаси соат 11 лар эди чамаси, бақирган овоз эшитилди. Қарасам ён қўшнимиз, келиним чақираётган экан. Борсам, йиқилиб ётган экан. Кейин келиним ‘ака, куёвим қизимни пичоқлаб кетди’, деди. Шунда мен қўлимга таёқ олиб, куёвнинг ортидан югурдим. Қарасам, қочиб кетган экан. Кейин қайтиб келдим. Келсам, келинимизнинг ҳали жони узилмаган экан. Ички ишлар ходимларига, тез ёрдамга телефон қилиб чақирдим», — дейди марҳума Назира Шернаеванинг қайинакаси ва қўшниси Шерзод Маҳаммадиев.
Ҳудуд профилактика инспектори Хондамир Холматовнинг маълумот беришича, қотил куёв ўша куни кечаси қўшни маҳалла ҳудудида қўлга олинган.
«2020 йил 9 декабрь куни соат 23:30 да Ички ишлар бўлимига Отчопар кўчасида тўрт киши пичоқлаб кетилгани ҳақидаги хабар келиб тушди. Зудлик билан воқеа жойига етиб бордим. Борсам, фуқаро Шернаева Назира, унинг қизи ва набиралари ўлдириб кетилганлиги, бу ишни унинг куёви қилганлигини маълум қилишди. Шундан сўнг куёвни излашга тушдик. Узоққа кетолмаган экан. Қўшни маҳалладаги йўлдан ушлаб, олиб келдик», — дейди ҳудуд профилактика инспектори Хондамир Холматов.
Хондамир Холматов ижтимоий тармоқлардаги дастлабки хабарларда қотилликка марҳума аёлнинг ахлоқсизлиги сабаб бўлган деган гапларга муносабат билдириб, «бу гап умуман ҳақиқатга тўғри келмайди. Боиси марҳуманинг хатти-ҳаракатида умуман ахлоқсизлик аломатлари йўқ эди. Бунга юз фоиз ишончим комил», — деди.
Туман прокуратураси терговчиси Заҳириддин Нуриддиновнинг қўшимча қилишича, мазкур ҳолат юзасидан хонадон куёви А.Б.га нисбатан 2020 йил 10 декабрь куни Яккабоғ туман прокуратураси томонидан Жиноят кодексининг 97-моддаси 2-қисми «а, б, в, ж» (икки ёки ундан ортиқ шахсни; ҳомиладорлиги айбдорга аён бўлган аёлни айбдорга аён бўлган ожиз аҳволдаги шахсни; ўта шафқатсизлик билан қасддан одам ўлдириш) бандлари билан жиноят иши қўзғатилган. Жиноят содир этишда гумонланаётган шахс процессуал тартибда ушланган ва унга қамоқ эҳтиёт чораси қўлланилган.
Қотилликда гумонланаётган куёв А.Б. яшовчи «Бунёдкорлик» МФЙ раисининг хотин-қизлар масалалари бўйича ўринбосари Саодат Отақулованинг айтишича, А.Б. ва Маржона Маҳаммадиевалар 2020 йилнинг май ойига қадар бирга яшаган. Сўнгра оилавий келишмовчилик сабаб алоҳида яшай бошлаган. МФЙ масъуллари эр-хотинни 2020 йилнинг июнь ойида яраштирган бўлса-да, улар 2020 йилнинг июль ойида умуман ажрашиб кетган.
«Келин Маржона ва унинг онаси менга телефон қилиб, яраштириб қўйган бўлсак-да, бирга яшолмаётганини, шу сабаб келиннинг юкини олишда ёрдам беришимни сўради. Онаси эса қизи ҳомиладорлигини айтиб, фарзандли бўлгунча у билан бирга яшашини айтди. Бунга келин ҳам, куёв ҳам рози бўлгач, келинни Яккабоғ туманига жўнатдик. Аммо келин билан ҳам куёв билан ҳам тез-тез гаплашиб турардик. Уларни яна яраштирмоқчи бўлганимизда, куёв рози бўлмаганди», — дейди Саодат Отақулова.
Саодат Отақулованинг қўшимча қилишича, қотилликда гумонланаётган А.Б.нинг онаси ўғли ёшлигидан ақли заиф бўлиб, улғайганини айтган.
«Кеча А.Б.нинг онаси билан гаплашганимда ўғли ёшлигидан ақлий носоғлом бўлиб улғайганини айтиб, қанақадир ҳужжат кўрсатди. Аммо мен йигитнинг ақли заифлигини сезмаганман», — дейди маҳалла масъули.
Мазкур қотиллик воқеасидан сўнг 2020 йил 10 декабрь куни вилоят прокурори Эркабой Тожиев, вилоят ИИБ бошлиғи Шуҳрат Сотволдиев марҳумалар хонадонида бўлиб, оиланинг ёлғиз аъзоси, марҳума Назира Шернаеванинг қизига ҳамдардлик изҳор қилган. Ва жамоатчилик билан қотилликни келтириб чиқарган сабабларни муҳокама қилган.
Вилоят масъулларининг воқеа жойига ташрифидан сўнг жиноятнинг содир этилишига ва масъулиятсизликка йўл қўйган Яккабоғ тумани ИИБ масъул ходимларига ҳамда Яккабоғ тумани, «Эски Яккабоғ» МФЙ ва Қамаши туманидаги «Қизилтепа» МФЙ масъулларига нисбатан идоравий хизмат текшируви тайинланган.
Изоҳ (0)